بغلان کې د نیالګیو کښېنولو کمپاین پیل شو

دبغلان ولایت دکرنې، اوبولګولو او مالدارۍ ریاست له خوا دنیالګیو کښېنولو کمپاین په داسې حال کې پیل شوه، چې د بغلان ولایت د مقام د دفتر رییس مولوی لعل جان راشد، ، دکرنې،اوبولګولو او مالدارۍ رییس قاري محراب الدین بلال، د اطلاعاتو او کلتور رییس مولوی اسدالله هاشمي، د چاپېریال ساتنې رییس انجنیر عین الدین کریمي، د کار او ټولنیزو چارو رییس قاري نصرت الله پارسا، د اداري اصلاحاتو او ملکي خدمتونو آمر انجنیر محمد ابراهیم عثماني، د طبیعي سرچینو آمر، په دې ولایت کې د کرنې او مالدارۍ په برخه کې دهمکارو مؤسسو استازو، دیوشمیر نورو ادارو مسؤلینو، ځوانانو،قومي مشرانو او ژورنالېستانو په کې گډون کړی وو.
یاد کمپاین د زرغون چاپېریال تر عنوان لاندې د یادو مشرانو له خوا د یو یو نیالګيو په کېنلو سره رسماً پیل شو.
ددې کمپاین په پیل غونډه کې د بغلان د کرنې ریاست چارواکو وویل، چې ددې کمپاین په ترڅ کې به ۸۵ زره مېوه لرونکي او بې مېوې ونې کښېنول شي.
یادو چارواکو ددې ولایت له اوسیدونکو وغوښتل، چې په دې کمپاین کې برخه واخلي او د نیالګیو پالنې او ساتنې ته پاملرنه وکړي.
دا کمپاین په داسې حال کې پیل شوی دی، چې تر دې مخکې دهېواد په یوشمېر نورو ولایتونو کې هم د نیالګیو کښېنولو کمپاین پیل شوي دي.