هلمند کې د ځمکې غصب مخنیوي تخنیکي پلاوي غونډه دائره شوه 

۲۰ مرغومې ۱۴۰۲ه‍.ش
۲۸ جُمَادَى الثاني ۱۴۴۵ ه‍.ق
د هلمند ولایت د ځمکې د غصب مخنيوي او غصب شویو ځمکو د تثبیت تخنیکي پلاوي خپله ۹۲یمه نوبتي غونډه ترسره کړه.
په یاده غونډه کې د یادې کمېټې رییس مولوی نیاز محمد وهاج تر څنګ نورو غړو هم حضور درلود.
تخنیکي پلاوي په نننۍ ناسته کې پر بېلابېلو موضوعاتو بحث او خبرې وکړې او په اړه یې لازمې کړنې ترسره کړې.
په دې غونډه کې په نهرسراج ولسوالی کې د ناصرانو، نورزو ، کاکړانو او اسحقزیو  ترمنځ د ۴۵۰۰ جریبه ځمکې پر سر رامنځته شوې دعوی په مورد  اړونده اسناد مطالعه شول او پرېکړه وشوه، ترڅو یوه ځانګړې پلاوي دي دغه موضوع تر دقیقې او بشپړې څېړنې وروسته د ځمکو د غصب مخنیوی کمیسون ته د بعدی اجرائتو په موخه واستوي .
همدارنګه په مارجې ولسوالی کې د اصلاح شویو تخمونو د تصدۍ د ۷۵۰۰ جریبه ځمکې د غصب څخه خلاصولو په موخه موجوده اسناد مطالعه شول، او په اړه یې پرېکړه وشوه ترڅو د سیمې اصحاب الحدود، کوردینات او کروکي یې ترتیب او وروستیو اجرائتو په موخه یې دوسیه مرکز ته ولېږدول شي .
ددې ترڅنګ د (سی ۳) په سیمه کې د حاجي ادم لخوا د لویو موټرانو د هډې د ځمکې موضوع وارزول شوه او تصمیم ونیول شو، ترڅو ښاروالی او ښارجوړونې ریاست ته یې اسناد محول کړل شي، چې هغوی یې له مخې  اصولي کړنې ترسره کړي .
همدارنګه په نننۍ ناسته کې د ځمکو د غصب مخنیوی کمیسون لخوا د استرداد شویو ځمکو د اجارو کړنلاره تشریح شوه.
تخنیکي پلاوي دغه راز  په نهرسراج ولسوالی کې د محمداسمعیل خان مېنې په نوم ښارګوټی، چې په ۵۲ .۴۲جریبه ځمکه کې جوړ دی، ددې ښارګوټي د اسنادو نیمګړتیاوو پوره کولو په پار مسؤلینو ته دنده وسپارل شوه، ترڅو دوسیه یې بشپړ او مرکز ته ولېږدول شي .
په یاده ناسته کې دغه راز د (پي ار ټي) سیمې د خلکو د ۴۰ جریبه ځمکې د ملکیت ددعوې په اړه پرېکړه وشوه ترڅو موضوع یې تر بشپړی څېړنې، دشخصي او امارتي ځمکو تر تفکیک وروسته دځمکو د غصب مخنیوی کمیسون ته ولېږل شي.
وروستیو کې د لسګونو مراجعینو املاکي ستونزې په مخامخ ډول واورېدل شوې او د حل په برخه کې ورته د اصولي کړنو ډاډ ورکړل شو.