غزني کې دوه سترې سړې خونې جوړېږي
٢۸ وږي ۱۴۰۲ه.ش
۴ ربیعالاول ۱۴۴۵ه.ق
د غزني په ولایت کې ددې ولایت د تازه مېوو او سبو د ساتنې په پار د اته زره ټنه په وړتیا سره دوه ستر او معیاري سړې خونې جوړېږي.
د غزني ولایت د کرنې، اوبولګولو او مالدارۍ رییس الحاج مولوی محمد ادریس حنیف وویل، چې دا سړې خونې د غزني مرکز اړوند د روضې او علي لالاسیمو کې د ملي سوداګرو په همکارۍ جوړېږي، چې نږدې یومیلیون امریکایي ډالر پرې لګښت راځي.
تر دې وړاندې په دې ولایت کې د کچالو ساتلو په پار وړې سړې خونې جوړې شوې وې، خو تر دې دمه د تازه مېوو او سبو د ساتلو په پار په معیاري بڼه کومه سړه خونه نه ده جوړه شوې.
د غزني د کرنې، اوبولګولو او مالدارۍ رییس وایي، چې ددې اته زره ټني سړې خونې د جوړولو چارې به په نږدې راتلونکې کې پیل شي. د هغه په خبره ددې سړې خونې په جوړولو کې به دېرو کسانو ته د کار زمینه هم برابریږي. هغه دغه راز وویل، چې ددې سړې خونې تر جوړېدو ورسته به یوشمېر کسانو ته د تلپاتې دندې زمینه هم برابره شي.
مڼه، انګور، زردالو، بادرنګ، رومي بانجان او کچالو د غزني ولایت تر ټولو عمده سابه اومېوې دي، چې ټاکل شوې په دې سړه خونه کې به وساتل شي او بیا بسته بندي او پروسس شي.
