غزنې کې د څه باندې ۶۷۷ زره امریکایي ډالرو په لګښت د ۳۸ پراختیایي پروژو چارې پیل شوې
د غزنې دکرنې، اوبولګولو او مالدارۍ ریاست وایي، چې د ملګرو ملتونو دخوړو او کرنې ادارې په مالي او د افغانستان لپاره د ناروې کمېټې په تخنیکي همکارۍ ددې ولایت د مرکز ترڅنګ په دوو ولسوالیو خواجه عمري او اندړو کې د اوبو د مدیریت په برخه کې د ۶۷۷ زره او ۴۶۲ امریکایي ډالرو په لګښت د ۳۸ پروژو چارې پیل شوي دي.
د غزنې ولایت دکرنې، اوبولګولو او مالدارۍ رییس الحاج مولوی محمد ادریس حنیف وویل، چې د غزني په مرکز او ددې ولایت د خواجه عمري او اندړو ولسوالۍ کې د باراني او سېلابې اوبو د مدیریت په موخه ټرنچونه او چکډمونو جوړولو چارې پیل شوي دي، چې د دغو پروژو په پلي کولو سره ۶۱۸۵ ځایي اوسیدونکو ته دکار زمینه برابره شوې ده.
د ښاغلي حنیف په خبره ددغو پروژو پلي کول نه یوازې دا چې خلکو ته د کار زمینه برابره کړې ده، ترڅنګ یې د وچکالۍ ستونزې هم تر یوې کچې راټیټوي.
د کرنې، اوبولګولو او مالدارۍ وزارت په هېواد کې د باراني او سیندزې اوبو مدیریت په پآر د هېواد په بېلابېلو ولایتونو کې د ګڼو پروژو چارې پیل کړي دي، چې به بشپړېدو سره به یې د باراني اویو د مدیریت ترڅنګ د ځمکې لاندې اوبو کچه هم لوړ او د هېواد د وچکالۍ ستونزه به تر یوې کچې راټیټه شي.
