د هلمند کرنې ریاست کارکوونکي د احصایې او شمیرنو د راټولولو په برخه کې وروزل شول
۸ وږی ۱۴۰۲ه.ش
۱۳ صَفَرُ المُظَفَّر ۱۴۴۵ه.ق
د کرنې، اوبولګولو او مالدارۍ وزارت، د پلان او برنامو د همغږۍ ریاست اړوند د کرنیزې احصایې او معلوماتو تنظیم ریاست کارکوونکی صبغت الله صمدي هلمند ته له رارسېدو سره سم، لومړی د هلمند د کرنې ریاست له رییس الحاج مولوي نظرمحمد صدیقي سره لیدنه وکړه او د خپل سفر موخه یې ورسره شریکه کړه.
ښاغلي صدیقي راغلي پلاوی ته د ښه راغلاست ترڅنګ د احصایوي ارقامو پر دقت او کره والي ټینګار وکړ او په دې برخه کې یې د کرنې وزارت راغلي پلاوي ته د همکارۍ ډاډ ورکړ.
راغلي پلاوي د کرنې له رییس سره تر لیدنې وروسته ددې ادارې کارمندانو ته د احصایوي ارقامو راټولو په اړه عامه پوهاوی ورکړ.
په دې پروسه کې د کرنیزو راپورونو لپاره د احصایوي ارقامو په دقیق ډول راټولولو، توحیدولو او بیا یې په اړه مرکز ته د راپور ورکولو برخه کې اړوند کارمندانو ته لازمې لارې چارې ور وښودل شوې.
د پوهاوی په دې ناسته کې د راغلي پلاوی لخوا ټینګار وشو ترڅو هغه ارقام او معلومات چې مرکز ته ورکول کېږي باید ډیر دقیق، کره او حقیقي وي ځکه چې د کرنې وزارت د اړتیا پر مهال له همدې معلوماتو او ارقامو څخه ګټه اخلي .
