لوګر ګې د څه باندې ۸۸ میلیونه افغانیو په لګښت یوشمېر پروژې ګټې اخیستنې ته وسپارل شول
۲ وږی ۱۴۰۲ه.ش
۷ صَفَرُ المُظَفَّر ۱۴۴۵ه.ق
د لوګر دکرنې، اوبولګولو او مالدارۍ ریاست چارواکي وایي، چې په دې ولایت کې د څه باندې ۸۸ میلیونه افغانیو په لګښت د یوشمېر پروژو چارې بشپږ او ګټې اخیستنې ته سپارل شوي دي.
د لوګر دکرنې ریاست په خبره د لوګر ولایت د محمدآغې ولسوالی اړوند ده نو سیمه کې په همدې موخه جوړه شوې غونډه کې، د ا.ا.ا د بهرنیو چارو وزارت سیاسي مرستیال الحاج شیرمحمد عباس ستانکزی، د کرنې وزارت د کرنې او مالدارۍ مرستیال مولوي صدراعظم عثماني، د اقتصاد وزارت مالي مرستیال مولوي محمدعالم جمیل، د صنعت او سوداګرۍ وزارت مرستیال مولوي قدرت الله جمال، د اقتصادي کمیسیون د پلان او پالیسۍ رییس مولوي روح الله شهاب، د لوګر ولایت مرستیال والي مولوي عنایت الله شجاع، دکرنې او مالدارۍ رییس مولوی سیدامین هاشمي،د امنیې قوماندانۍ د امنیت آمر مولوي کفایت الله ملنګ، د دویمي واحدونو یو شمېر رییسانو، علماوو، مشرانو او ځوانانو ګډون کړی وو.
په دې غونډه کې، د لوګر د کرنې او مالدارۍ رییس مولوي سید امین هاشمي وویل؛ دغه پروژې، چې د مرکز په ګډون دلوګر ولایت د محمدآغې او خروار ولسوالیو کې پر ١٧٠ جریبه ځمکه باندې ١٦ زره مثمر او غیر مثمر نیالګي اېښودل او همدارنګه د ١٠٧ کیلومتره کانالونو پاکول او ٢٠ جریبه مثمر بڼونو جوړول شامل دي، چې د خوړو نړیوالې اداې په مالي ملاتړ او(اچ.آر.ډيږاي) مؤسسې له لوری د لوګر د کرنې او مالدارۍ ریاست په تخنیکی همکاري د ٩ میاشتو موده کې بشپړ او د پلي کولو پرمهال یې ٢٠٠٠ کسانو ته کاري فرصت هم برابره شوې وه.
دغه راز د کرنې وزارت د کرنې او مالدارۍ مرستیال مولوي صدراعظم عثماني وویل: «د وچکالیو سره سره د تېرو دو کلونو په موده کې د همکارو موسسو په مرسته د کرنې او مالدارۍ او د چک ډېمونو د جوړولو په برخو کې ښه پرمختګونه شوي دي او سږ کال د غنمو په حاصلاتو کې هم کابو دېرش سلنه زیاتوالۍ راغلی دی.»
ورته مهال د بهرنیو چارو وزارت سیاسي مرستیال الحاج شیرمحمد عباس ستانکزي، د یادو پروژو مبارکي ټولو ولسونو ته وړاندې او زیاته یې کړه، چې له څو لسيزو وروسته موږ ټولو په آرامه فضا کې د یو شمېر پرمختګونو شاهدان یو، لوګر تاریخي ولایت د علماوو او مبارزینو کور دی، د جهاد دروازه ده، د دې خاورې لوېشت لوېشت قرباني ورکړی، لوی لوی کانونه او ښه جغرافیایي موقعیت لري، ده له اړوندو وزارتونو غوښتنه وکړه، چې د لوګر د بیا جوړولو برخې ته پوره پاملرنه وکړي.
ښاغلي عباس وړاندې وویل، چې اسلامي امارت په کمو امکاناتو د خپل ولس په خدمت او د هېواد آبادولو او همدارنګه د کرنې او سوداګرۍ برخو کې ښې لاسته راوړنې لري.
د لوګر ولایت مرستیال والي مولوي عنایت الله شجاع وویل؛ اوس د هېواد د آبادۍ لپاره وخت را رسېدلی، موږ له مرکزي ادارو څخه غوښتنه کوو، چې د لوګر د ښېرازۍ لپاره د کوټلي ګامونو پورته کړي.
د مشرانو او بزګرانو په استازیتوب استاد فزیر احمد عثماني له ترسره شویو پروژو مننه وکړه او ترڅنګ یې د کرنې، د اوبو د نشتون په برخو کې یو لړ وړاندیزونه شریکې کړې او هم یې د بزګرانو د تولیداتو لپاره د بازار موندنې غوښتنکی شو.
د یادونې وړ ده، چې په نږدې راتلونکي کې به هم په لوګر کې د یو ستر څېړنیز فارم د جوړولو چارې هم پیل شي.
