هلمند کې د ځمکو د غصب مخنیوي تخنیکي کمېټې کړنې
۲۳ زمری ۱۴۰۲ه.ش
۲۷ مُحَرَّمُ الحَرام ۱۴۴۵ه.ق
د هلمند ولایت د ځمکو د غصب مخنيوي او غصب شویو ځمکو د تثبیت تخنیکي پلاوی خپله ٥۷ نوبتي غونډه ترسره کړه، چي پکې د یادې کمېټې رییس الحاج مولوي نظر محمد صدیقي تر څنګ د فرمانونو، حکمونو او هدایاتو د تعقیب او څار رییس مولوي عبدالجبار هجرت، د عدلیې رییس مولوي محمد محمدي، د لښکرګاه ښاروال مولوي عبدالله روحاني، هلمند مستوفي ملاحمیدالله رابط، د کور او ښار جوړولو چارو رییس مولوي نیک محمد معتصم، د کار او ټولنیزو چارو رییس مولوي رحیم الله مخلص، د امنیې قوماندانۍ استازی ملا عبدالرحمن طلحه ، د قضایای امارت امر مولوي عبدالقاهر عاصم، د ځمکو آمریت استازی انجنیر حامد رسولي او نورو غړو هم حضور درلود.
په غونډه کې پر مهمو موضوعاتو تر خبرو اترو وروسته د غونډې ګډونوال په ٢ کاري ګروپونو ووېشل شول، چې لومړی ګروپ د ګډ ولایتي پلاوی په ترکیب سره د ګرشک ولسوالی ته سفر وکړ، په یاده ولسوالی کې د نفت او ګازو دولتي شرکت د غصب شوې ځمکې، د هلمند ولایت ټول ګټوو چارو ریاست اړوند ځمکې او د حاجي محمدطیب تر ادعا لاندې ځمکې بررسي او ارزونه ترسره شوه.
دویم کاري پلاوی په پیل کې د ٤ املاکي ذوالیدي اړوند دوسیو ترتیب شوي راپورونه تحلیل او مطالعه کړل، چې له ډلې یې یاد راپارونه تائید او لاسلیک شول او د وروستیو کړنو لپاره د غصب مخنیوی کمیسیون ته ولېږدول شول.
دویم کاري پلاوی د یوشمېر نورو مراجعینو د کارونو تر اجرا وروسته په لښکرګاه ښار کې د بېلابېلو امارتي ځمکو څخه لیدنه او ارزونه ترسره کړه او د ځینو سیمو د امارتي او شخصي ځمکې د تثبیت او تفکیک په موخه یې په سیمو کې اړوندو چارواکو، اشخاصو او افرادو ته لازم هدایتونه ورکړل.
