ننګرهار کې د ځمکې غصب مخنیوي او غصب شویو ځمکو بېرته راګرځولو پلاوي کړنې
د ننګرهار مرستيال والي مولوي سعيد احمد بنوري په مشرۍ د غصب مخنيوي تخنيکي پلاوي مشر او د ننګرهار د کرنې رییس مولوي عبدالستار محمد او غړو يې د بټي کوټ امبارخانې سيمه کې تثبيت شوې امارتي ځمکې څخه لیدنه وکړه.
يادو مسئولينو او تخنيکي ټيم په سيمه کې ځايي خلکو ته د اسنادو او نقشو په ښودلو سره شاوخوا ۸۰۰ جريبه ځمکه چې دوی ورشو ياڅړ ځای يادوه د سيند بستر او يوه برخه يې امارتي کرنيزه ځمکه تثبيت کړه.
د ولايت مرستيال د اسنادو او شواهدو په ليدنې سره ياده ځمکه امارتي وبلله او د غصب مخنيوي تخنيکي پلاوي ته يې د اصولو له مخې د اجراتو سپارښتنه وکړه.
د غصب مخنيوي تخنيکي پلاوي مشر مولوي عبدالستار محمد وويل، چې په دې سيمه کې يې ۲۰۴ جريبه ځمکه د داوطلبۍ په ترڅ کې په قرارداد ورکړې او د نورې ځمکې رغونې او ورڅخه د ګټې اخيستنې په موخه اصولي اجرات کوي.
باید وویل شي، چې د ننګرهار ولایت د ځمکې د غصب مخنیوی او غصب شویو ځمکو د بېرته راګرځولو کمېټه تر دې دمه په دې ولایت کې د ډېرو ځمکو د غصب مخه نیولی او ترڅنګ یې ډېر غصب شوي ځمکې بېرته راګرځولي دي.
