کندهار کې د کرنیزو درملو سوداګرو سره غونډه دائره شوه

د کرنې، اوبو لګولو او مالدارۍ وزارت په لارښوونه، د کندهار د کرنې، اوبو لګولو او مالدارۍ رییس الحاج مولوی فضل الباري فضلي په مشرۍ، د کندهار د کرنې ریاست په مقام کې د کرنیزو درملو سوداګرو سره د قاچاقي درملو د مخنیوي او وارد شویو بلټي درملو د ستونزې د حل په موخه ځانګړې غونډه دائره شوه.
په دې غونډه کې د کرنې وزارت د بوټو ژغورنې ریاست استازي مولوی معین الله ابوخالد، د کندهار ولایت مقام استازي، د کرنې ریاست د کرنیزو چارو آمر مولوی شمس الرحمن موسا، د طبیعي سرچینو آمر مولوی عبدالغني عفان، د نبات ژغورنې مدیر انجنیر ذبیح الله، د کندهار امنیه قوماندانۍ، استخباراتو استازو او د زراعتي درملو سوداګرو ګډون کړی و.
د غونډې په پیل کې د کندهار د کرنې، اوبو لګولو او مالدارۍ رییس الحاج مولوی فضل الباري فضلي وویل:«ولس د ځان او مال ساتنې لپاره پر نظام حق لري، او نظام مکلف دی، چې د خلکو ستونزې حل کړي.»
نوموړي د قاچاقي او بلټي درملو د مخنیوي په اړه وویل: «موږ باید داسې پریکړه وکړو چې زموږ ولس ته د مالي زیان مخه ونیول شي. دا ځل به ټول بلټي درمل ارزول کېږي څېړل کېږي، او یوازې هغو درملو ته به د همدې یوځل لپاره اجازه ورکړل شي، چې ضرر ونه لري. هغه درمل چې د کرنې سکتور ته زیان رسوي، په هیڅ صورت به ورته اجازه  ورنه کړل شي».
ښاغلي فضلي زیاته کړه: «دا ستونزه د ولس د راحت او مالي زیان مخنیوي لپاره حل کوو، خو په راتلونکي کې به د کرنیزو درملو لپاره دا ډول حللاره نه عملي کېږي. ټول سوداګر باید د قاچاقي درملو پر ځای د قانوني لارو څخه کار واخلي، ترڅو د غیرقانوني درملو واردولو له امله له ستونزو سره مخ نه شي.»
په ورته وخت کې، د کرنې وزارت د بوټو ساتنې ریاست استازي مولوی معین الله ابوخالد هم د قاچاقي کرنیزو درملو پر مخنیوي ټینګار وکړ او زیاته یې کړه: «هر هغه څه چې د نظام له اصولو سره مخالف وي، قاچاق بلل کېږي. نو ټول سوداګر باید هڅه وکړي چې کرنیز درمل یوازې د قانوني لارو څخه وارد کړي.»
په غونډه کې د کرنیزو درملو سوداګرو د کندهار د کرنې رییس څخه مننه وکړه او ملي سوداګرو د قانوني درملو واردولو لپاره د همکاري غوښتنه وکړه، چې ټول کرنیز درمل د نظام او اصولو مطابق وارد شي. 
په پای کې، د کندهار د کرنې رییس یو ځل بیا د قاچاقي او غیرقانوني کرنیزو درملو پر مخنیوي ټینګار وکړ او ملي سوداګرو ته یې د همکارۍ ډاډ ورکړ، ترڅو ټول کرنیز درمل د قانوني لارو څخه وارد شي.