کندهار کې د شاتو تولید بېساری زیاتوالی؛ د پسرلي په موسم کې ۴۴.۴ ټنه شات تولید او بازار ته وړاندې شو
۱۸ چنګاښ ۱۴۰۵ هـ.ش
۲۳ مُحَرَّمُ الحَرام ۱۴۴۸ه.ق
د کندهار د کرنې، اوبو لګولو او مالدارۍ ریاست د معلوماتو له مخې د روان ۱۴۰۵ کال د پسرلي په موسم کې په دې ولایت کې د شاتو تولید د تېر کال د همدې مودې په پرتله د پام وړ زیات شوی او ۴۴.۴ مټریک ټنه شات تولید او بازار ته عرضه شوي دي.
د کندهار د کرنې ریاست د مالدارۍ آمریت مسلکي مسؤلین وایي، د شاتو تولید کې دغه بېساری زیاتوالی د کرنې ریاست د ځانګړې پاملرنې، د شاتو مچیو د معیاري فارمونو د شمېر زیاتېدو او د مالدارانو د ظرفیت لوړولو له امله رامنځته شوی دی.
د کندهار دکرنې ریاست د مالدارۍ آمریت اړوند مسؤل عبدالوارث حقمل وویل، د روان کال د پسرلي په موسم کې د کندهار په مرکز او بېلابېلو ولسوالیو کې ۴۴.۴ مټریک ټنه شات تولید او بازار ته وړاندې شوي دي. د نوموړي په وینا، د معیاري فارمونو پراختیا او د کرنې ریاست دوامدارې تخنیکي همکارۍ د شاتو د تولید په زیاتوالي کې مهم رول لوبولی دی.
ورته مهال، د مالدارۍ آمریت بل مسؤل محمدالله نوري وایي، دا مهال په کندهار ولایت کې د شاتو مچیو ۲۶ محلي او ۴۲ عبوري فارمونه فعال دي، چې د کندهار ښار ترڅنګ په ارغنداب، شاهوليکوټ، ژړۍ، پنجوایي، میوند او ډنډ ولسوالیو کې فعالیت کوي.
د نوموړي په خبره، تېر ۱۴۰۴ کال کې په ټولیز ډول ۴۳ فارمونه فعال وو، خو سږ کال یوازې د پسرلي تر پایه د فعالو فارمونو شمېر ۶۸ ته لوړ شوی، چې له امله یې د شاتو تولید هم په څرګند ډول زیات شوی دی.
د یادونې وړ ده، چې په ۱۴۰۴ هجري لمریز کال کې د پسرلي او دوبي په موسمونو کې ټولټال ۵۶ مټریک ټنه شات تولید شوي وو، چې له دې جملې ۲۱ مټریک ټنه یې د پسرلي شات وو. خو سږ کال یوازې د پسرلي په موسم کې د شاتو تولید ۴۴.۴ مټریک ټنو ته رسېدلی، چې د تېر کال د همدې مودې په پرتله څه باندې ۲۳ مټریک ټنه زیاتوالی ښيي او د کندهار د شاتو د تولید په برخه کې د پام وړ پرمختګ ګڼل کېږي.
