کابل کې د نیالګیو له تولید فارمونو څخه څارنه
۲۶ کب ۱۴۰۴ه.ش
۲۸ رَمَضانُ المُبارَک ۱۴۴۷ه.ق
د کرنې، اوبولګولو او مالدارۍ وزارت د قدرتي سرچینو لوی رییس، مولوي عبدالاحد خلیل، په کابل کې د نیالګیو د تولید له مرکزي فارمونو څخه لیدنه وکړه او د نیالګیو د تولید او وېش بهیر، د روان کال پلي شوې پراختیایي پروژې او د دغو فارمونو عمومي وضعیت یې وڅاره.
د دې لیدنې په ترڅ کې، نوموړي د هېواد د زرغونتیا د پراختیا او د اقلیمي بدلونونو پر وړاندې د مبارزې په برخه کې د نیالګیو د تولیدي فارمونو پر اهمیت ټینګار وکړ او له مسئولینو یې وغوښتل، چې د ټولنې اړتیاوو او د خلکو غوښتنې ته په کتو سره د نیالګیو تولید زیات کړي.
همدارنګه، د فارمونو له بېلابېلو برخو څخه هم لیدنه وشوه او موجودې ستونزې د مسئولینو له لوري مطرح شوې، چې په تعقیب یې د دغو ستونزو د حل لپاره د همکارۍ ژمنه وشوه.
د یادونې وړ ده، چې هر کال د دغو فارمونو له لارې بېلابېل مثمر او غیر مثمر نیالګي، بوټي او زینتي ګلان تولیدېږي او غوښتونکو، جوماتونو، ښوونځیو، روغتونونو او عامه سیمو ته وېشل او کېنول کېږي، څو په هېواد کې د زرغونتیا د پراختیا زمینه برابره شي.
