پکتيا:د ځمکو د غصب د مخنيوي کميټې غړو د زرمت ولسوالی له ولسوال سره ناسته ترسره کړه
۶ زمری ۱۴۰۱ ه.ش
۲۹ ذوالحجَّة ۱۴۴۳ ه.ق
د پکتيا ولايت دکرنې، اوبولګولو او مالدارۍ رياست وايي، چې د ځمکو د غصب د مخنيوي کميټې غړو زرمت ولسوالی ته د خپل کاري سفر په ترڅ کې د يادې ولسوالی له ولسوال سره ناسته ترسره کړه.
په ياده ناسته کې د امارتي ځمکو د غصب د مخنيوي په اړه د اميرالمؤمنين فرمان او د ياد فرمان د تطبيق لپاره جوړ شوی طرزالعمل او کاري پلان شريک شول.
د غصب د مخنيوي کميټې غړو د زرمت ولسوالی له مسولينو وغوښتل، چې په ياده ولسوالی کې د غصب شويو ځمکو د حدودو د تثبيت، د غصب کوونکو د معلومولو او د غصب شويو ځمکو د مخنيوي په برخه کې له ټاکل شوې کميټې سره همکاري وکړي.
د يادولو وړ ده، چې د غصب شويو ځمکو د مخنيوي کميټې غړي به خپلې عملې کړنې د لومړنيو معلوماتو د ترلاسه کولو وروسته ډېر ژر پيل کړي.
