هلمند کې پر لسګونو بزګرانو د سبو اصلاح شوي تخمونه ووېشل شول
۲۹ سلواغه ۱۴۰۱ه.ش
۲۷ رَجَب المُرَجَّب ۱۴۴۴ ه.ق
د هلمند ولایت کرنې، اوبولګولو اومالدارۍ ریاست له خوا د ډاکار(DACAAR) مؤسسې په مالي همکارۍ ددې ولایت د ناوې او مارجې ولسوالیو ١٠٠تنو بزګرو ته د سبو پسرلني اصلاح شوي تخمونه وېشل شوي دي.
د یادو مرستو په لړ کې هر بزګر ته یو کیلو ګرام د بینډیو، ٧٠ګرامه د تورو بانجانو او ١٠٠ ګرامه د رومیانو اصلاح شوي تخمونه وېشل شوي دي، چې بزګر به یې د پسرلني کرکیلې په موخه په خپلو ځمکو کې وکري.
د یادو تخمونو د وېش پر مهال د نوموړو ولسوالیو د کرنیزو خدمتونو مدیرانو بزګرو ته سپارښتنې وکړې چې د ترلاسه شویو اصلاح شوو تخمونو په ښې روزنې او پالنې کې د کرنې ادارې اړوند فني او مسلکي کارمندانو لارښؤنې په پام کې ونیسي تر څو د قناعت وړ حاصلات ترلاسه کړي.
د یادولو وړ ده، چې یادو بزګرو ته د نوموړو تخمونو د کرکیلې په اړه عملي او نظري پوهاوی هم ورکول شوي دي .
