ننګرهار کې ۱۳ تنو ته د حیواني محصولاتو د پېر او پلور د مرکزونو جوړولو په موخه روزنه ورکړل شوه
د ننګرهار دکرنې، اوبولګولو او مالدارۍ ریاست سره په همغږۍ د افغانستان لپاره د هالنډ کمیټې په تخنيکي او داروپايي ټولنې په مالي ملاتړ د کابل، ننګرهار، بامیان او غزني ولایتونو ۱۳ تنو ته دحیواني محصولاتو د پېر او پلور مرکزونو جوړولو په موخه روزنه ورکړل شوه.
د ننګرهار د کرنې ریاست د مالدارۍ خدمتونو او څارویو روغتیا امر داکتر محمد ضمیر بهسودي یاد ورکشاپ اړین وباله او د مالدارۍ سکتور د پیاوړتیا او افغانانو ته یې د کار زمیني برابرولو یو فرصت یاد کړ.
بهسودي د هالنډ کمیټې له مسولینو د درملو، واکسینونو، چینجیو ضد درملو، لبنیاتو تولید او پروسیس کارخونو جوړولو او ګڼو نورو برخو کې د ننګرهار مالدارانو ته دچوپړتیاوو وړاندې کولو غوښتنې وکړې.
دغه راز په یاد ورکشاپ کې دوکاندارانو ته د حیوانې محصولاتو د پېر او پلور سوداګریزو لارو چارو، د وړیو پروسس، دکشميرې پروسس، د لبني محصولاتو پروسس، او د حفظ الصحې د مراعتولو په برخه کې روزنه ورکړل شوه.
د ورکشاپ په پای کې یادو کسانو ته دکار وبار د پیل او لومړنی پانګې په موخه د ۵۰۰ دالرو معادل افغانۍ نغدي مرسته وشوه او همدارنګه برقي تله، لوحه او قرطاسیه هم ورکړل شو .
