ننګرهار کې د کوز سلطانپور د کانال د بیارغونې چارې بشپړ او ګټې اخیستنې ته وسپارل شو
۲۵ سلواغه ۱۴۰۱ه.ش
۲۳ رَجَب المُرَجَّب ۱۴۴۴ ه.ق
د ننګرهار د کرنې، اوبولګولو او مالدارۍ ریاست په هڅو د ملګرو ملتونو د پرمختیایي پروګرام (UNDP/NIL) د آبادۍ پروژې په مالي او د « روډ آف پیس » مؤسسې په تخنیکي همکارۍ د دې ولایت د سرخرود ولسوالی کې د سلطان پور د اوبولګولو کانال د بیارغونې چارې د څه باندې دوه نیم میلیونه افغانیو په لګښت بشپړ او ګټې اخیستنې ته وسپارل شو.
په دې اړه جوړه شوې غونډه کې، د ننګرهار دکرنې، اوبولګولو او مالدارۍ ریاست استازي، د یادې ولسوالی چارواکو او د سیمې مشران او یوشمېر اوسیدونکو ګډون درلود.
د چارواکو په خبره دغه کانال ۳۸۰ متره اوږدوالی لري، چې په اساسي ډول رغول شوی دی. دغه راز ددې پروژې په جریان کې ۹۰۰ کسانو ته د کار زمینه برابره شوې وه، چې په بشپړېدو سره یې ۳۰۰ جریبه ځمکه خړوبېږي.
ددې پروژې د پلي کولو موخه د اوبو د ضایعاتو مخنیوی، خلکو ته د کار زمینه برابرول او په ټوله کې د اوبو مدیریت او بزګرانو ته اسانتیاوې برابرول دي.
