میدان وردګ کې ۷۶۵ متراکم او عادي بڼونه جوړېږي

۱۰ وری ۱۴۰۰
د میدان وردګو ولایت دکرنې، اوبولګولو او مالدارۍ ریاست وایي، چې په دې ولایت کې د ۷۶۵ جریبه نویو بڼونو د جوړولو په پار پر بڼوالو د نیالګیو د وېش لړۍ پای ته ورسېد.
د میدان وردګو د کرنې ریاست د چارواکو په خبره ددغو ۷۶۵ جریبه بڼونو له ډلې ۳۵ جریبه یې متراکم بڼونه دي، چې دکرنې وزارت د بڼوالۍ ځنځیري ارزښت د ودې سکټورې پروژې «HVCDSP» او ۷۳۰ جریبه نور یې عادي بڼونه دي، چې د کرنې او خوړو خوندیتوب بېړنۍ پروژې «EATS» له خوا جوړېږي.
د میدان وردګو ولایت د کرنې ریاست چارواکي وایي، چې د مېوو نوي بڼونه جوړول په دې ولایت کې د بڼوالۍ په برخه کې بې ساري پرمختګ دی.
د میدان وردګو ولایت دکرنې ریاست پر دې سربېره، چې کروندګرو ته تصديق شوي نيالګي ورکړي دي، له هغوی سره د باغونو په نقشه اچولو، د اوبولګولو د سيسټم په جوړولو او د بڼوالۍ د مديريت اړوند ځينو نورو برخو کې هم تخنيکي او فني مرستې کوي.
د کرنې وزارت هلې ځلې کوي، چې میدان وردګو ولایت کې بڼوالۍ ته وده ورکړي، هغه ونې دود کړي، چې په ډېره لنډه موده کې مېوه نیسي او ښه کمیت او کیفیت لرونکي وي، تر څو د بڼوالۍ محصولات ډېر او د بڼوالو عواید زیات شي.