میدان وردګو کې د غنمو د حاصلاتو زیاتوالي او د کرنیزو میتودونو د دودولو په موخه ۱۵ ننداریزې کروندې جوړې شوې
۲۰ لړم ۱۴۰۵ هـ.ش
۳۰ جُمَادَى الأول ۱۴۴۸ هـ.ق
د میدان وردګو ولایت د کرنې، اوبولګولو او مالدارۍ ریاست د کرنیزو خدمتونو د پراختیا، د غنمو د حاصلاتو زیاتوالي او د عصري کرنیزو میتودونو د دودولو په موخه، د دغه ولایت د مرکز په ګډون په نهو ولسوالیو کې بزګرانو ته د غنمو ۱۵ ننداریزې کروندې جوړې کړې.
یادې ننداریزې کروندې د میدان وردګو ولایت د کرنې، اوبولګولو او مالدارۍ ریاست د کرنیزو چارو آمریت د مسؤولینو له لوري د اړوندو ولسوالیو له بزګرانو سره په همغږۍ په کتاري بڼه کرل شوې دي.
د دغو ننداریزو کروندو د جوړولو پر مهال، د کرنې ریاست مسؤولینو د اړوندو بزګرانو ترڅنګ د سیمې نورو بزګرانو ته هم د کتاري کښت د ګټو او اهمیت په اړه هر اړخیز معلومات ورکړل او په عملي توګه یې وروزل. په دې روزنه کې د غنمو د حاصلاتو د زیاتوالي، د ښو حاصل ورکوونکو وږو د ځانګړتیاوو، د اوبو لګولو د مناسبو لارو چارو او د هرزه بوټو د کنټرول په اړه معلومات وړاندې شول.
د میدان وردګو ولایت دکرنې ریاست د کرنیزو چارو آمریت مسؤولین په پام کې لري، چې په راتلونکي کې هم له یادو بزګرانو سره بېلابېلې کرنیزې تجربې او نوې لارې چارې شریکې کړي او وخت پر وخت د دغو ننداریزو کروندو څارنه وکړي، څو بزګران په عملي توګه له معیاري کرنیزو میتودونو سره بلد او په خپلو کروندو کې یې پلي کړي.
بلخوا، د یادو ولسوالیو بزګرانو د غنمو د ننداریزو کروندو د جوړولو له پروګرام څخه خوښي څرګنده کړې او د کرنې ریاست له مسؤولینو یې مننه کړې ده. دوی همدارنګه غوښتنه کړې، چې په راتلونکي کې دې ورته نورې ننداریزې کروندې هم جوړې شي، څو د عصري کرنیزو لارو چارو په خپلولو سره د خپلو کرنیزو محصولاتو کچه لوړه کړي.
د کرنې، اوبولګولو او مالدارۍ وزارت د هېواد په کچه د کرنیزو محصولاتو د زیاتوالي، د اصلاح شویو تخمونو او معیاري کرنیزو میتودونو د ترویج او د بزګرانو د ظرفیت لوړولو په موخه بېلابېل پروګرامونه پلي کوي. د ننداریزو کروندو جوړول د دغو هڅو یوه مهمه برخه ده، چې له لارې یې بزګران په عملي توګه له نویو کرنیزو تخنیکونو سره بلد کېږي او د کتاري کښت، مناسبو اوبو لګولو، د هرزه بوټو کنټرول او نورو معیاري لارو چارو په خپلولو سره کولای شي خپل حاصلات زیات او د کرنې په برخه کې د تولید کچه لوړه کړي.
