لغمان کې په ۲۱۱ بزګرانو د سویابینو تخم او کیمیاوي سرو وېش لړۍ پیل شوې

د لغمان ولایت د کرنې، اوبولګولو او مالدارۍ ریاست په هلو ځلو د خوړو او زده کړې نړیوالې «NEI» مؤسسې په مالي همکارۍ، ددې ولایت د مرکز مهترلام ترڅنګ د علیشنګ او الینګار ولسوالیو په ۲۱۱ بزګرانو د سویابینو اصلاح شوي تخم او کیمیاوي سرې وېش لړۍ د لغمان مرکز مهترلام څخه پیل شوی دی.
د لغمان دکرنې ریاست چارواکي وايي، چې په یادو ۲۱۱ بزګرانو په هر یوه بزګرشپږ  کیلوګرامه دسویابینواصلاح شوي تخم نهه کیلوګرامه توره سره او دوه نیم کیلوګرامه سپینه سره وېشل ورکول کېږي. دغه راز د سیویابینو د ۱۱ ننداریزو کروندو جوړولو په پار هر بزګر ته د درې جریبه ځمکو لپاره ۴۲ کیلوګرامه د سویابینو اصلاح شوي تخم، ۱۵ کیلو ګرامه یوریا او ۲۷ کیلوګرام ډي.اي.پي سره ورکول کېږي.
د یاد پروګرام په ترڅ کې ګټه اخیستونکو بزګرو ته د سویابینو د اقتصادي، طبیعي او غذایي ارزښت ترڅنګ، د کرلو، اوبو لګولو، د سرو استعمال اوخشاوې په هکله روزنه هم ورکړل شوې ده. 
د یادونې وړ ده چې، د لغمان د کرنې ریاست ددې زمینه هم برابره کړې ده، ترڅو د یادي ځمکي څخه د سویابینو راټول شوي محصولات به بېرته د همدې موسسې له لارې له بزګرو څخه وپېرل شي.
د لغمان د کرنې ریاست هڅه کوي، چې لغمان کې سویابین ترویج کړي او په راتلونکو کلونو کې دا لړۍ نوره هم وغځوي او د ولایت په کچه ترې ټول ځمکوال برخمن کړي.
سویابین بشپړه پروتیني او مغذي مواد لري، د کورنیو د روغتیا په ځانګړي ډول د ماشومانو د خوارځواکۍ په مخنیوي کې رغنده رول لري.