د کندهار ژړۍ کې د اوبو رسولو کانال چارې ۸۰ سلنه بشپړې شوې
۱۱ سلواغه ۱۴۰۳ه.ش
۱ شَعبان المُعَظّم ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د اقتصاد ریاست په همغږۍ او د ملګرو ملتونو د پرمختیایي پروګرام (یو. ان. ډې. پي) ادارې په مالي ملاتړ، د سولې بنسټ مؤسسې د سیبارډ پروګرام له لارې، د ژړۍ ولسوالی په مهاجرینو سیمه کې د "ګورۍ" په نوم د اوبو رسولو کانال جوړولو چارې پیل شوي، چې تر دې دمه ۸۰ سلنه یې بشپړې شوي دي.
د کندهار دکرنې ریاست د طبعي سرچینو آمریت انجنیر نورمحمد همکار وایي، دغه کانال ۳.۵ کیلومتره اوږدوالی، ۷۵ سانتيمتره لوړوالی او ۱.۳۰ متره پراخوالی لري. د هغه په وینا، پاتې چارې به یې په نږدې وخت کې په اساسي او پایداره ډول بشپړې شي. نوموړی زیاتوي چې د کانال د جوړېدو ترڅنګ ۲۰ کسانو ته په فني او ۸۰ کسانو ته په غیرفني ډول د کار زمینه برابره شوې ده.
په ورته وخت کې، د ژړۍ ولسوالی سیمه ییز اوسېدونکي د کرنې ریاست او ملګرو ملتونو د پرمختیایي پروګرام (یو. ان. ډې. پي) ادارې څخه خوښ دي او هیله څرګندوي، چې د دې کانال له جوړېدو سره به د اوبو رسولو ستونزې هوارې شي.
د ا په داسې حال کې ده، چې میاشت وړاندې د کندهار د کرنې ریاست په هڅو او د ملګروملتونو پراختیایي ادارې په مالي ملاتړ، د سپین بولدک ولسوالی په بېلابېلو سیمو کې د ۵.۸ میلیونه افغانیو په ارزښت د درېیو نورو اوبو رسولو کانالونو د جوړېدو چارې پیل شوې وې.
د یادونې وړ ده، چې دوه اوونې وړاندې هم د کندهار کرنې ریاست په هڅو، د اروپایي ټولنې په مالي ملاتړ، د ۸۵۲ زره امریکایي ډالرو په ارزښت، د کندهار اوومه ناحیه کې د "پنجاو" د اوبو رسولو کانال جوړ او ګټې اخیستنې ته وسپارل شو.
