د کندهار په باغپُل سیمه کې د نږدې ۷۰ کارټنه قاچاقي کرنیزو درملو او امو د انتقال مخه ونیول شوه
۴ زمری ۱۴۰۵ هـ.ش
۱۱ صَفَر المُظَفَّر ۱۴۴۸ هـ.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د بوټې ژغورنې مدیریت د قرنطین مسؤلینو د کندهار ښار د اوومې ناحیې اړوند باغپُل سیمه کې د ۶۰ کارټنه قاچاقي امو او ۸ کارټنه کرنیزو درملو د انتقال مخه ونیوله.
د مسؤلینو په وینا، په نیول شویو توکو کې ۶۰ کارټنه پاکستاني د امو مېوه او دغه راز د کرنیزو نباتاتو او څارویو بېلابېل ډوله درمل شامل وو، چې غوښتل کېدل په پټه او غیر قانوني توګه د هلمند بارمچي له لارې د کندهار ښار ته ولېږدول شي.
سرچینې زیاتوي، یاد درمل او ام د قرنطین مسؤلینو د پر وخت هڅو او همغږۍ په پایله کې د باغپُل په سیمه کې کشف او ضبط شول، او د قاچاق هڅه یې شنډه کړه.
د یادونې وړ ده، چې څه موده وړاندې هم د همدې مسؤلینو له لوري له پاکستان څخه کندهار ته د لسګونه کارټنه قاچاقي کرنیزو درملو او امو د انتقال مخه نیول شوې وه.
د کرنې ریاست مسؤلین وایي، د غیر قانوني او بې کیفیته کرنیزو درملو د قاچاق پر وړاندې به خپلې هڅې لا ګړندۍ کړي، څو د بزګرانو، کرنیزو حاصلاتو او چاپېریال خوندیتوب یقیني شي.
