د کندهار لوړ شاولیکوټ کې زرګونو څارویو لپاره د چنجیو ضد درمل د ویش کمپاین پیل شو

د کندهار د کرنې، اوبو لګولو او مالدارۍ ریاست په هڅو، له جرمونو او مخدره توکو سره د ملګرو ملتونو د مبارزې دفتر (یو. اِن. او. ډي. سي) په مالي ملاتړ، د هالند کمېټې په تخنیکي همکارۍ ددې ولایت په لوړ شاولیکوټ ولسوالۍ کې ۱۰ زره څارویو لپاره د چنجیو ضد درمل د ویش کمپاین پیل شو.
د کندها د کرنې او مالدارۍ ریاست د مالدارۍ آمریت مسؤلین وایي؛ چې د درملو د ویشلو تر څنګ، مالدارانو ته د یادو درملو د سم استعمال طریقه هم ښوول شوې، ترڅو دوی وکولای شي له دې درملو اعظمي ګټه پورته کړي.
د دې کمپاین موخه د څارویو د داخلي پرازیتونو کنټرول، د مالدارۍ سکتور ته سالمه وده ورکول، د مالدارانو اقتصادي ملاتړ، د څارویو محصولاتو زیاتوالی، او د چنجیو له امله رامنځته کېدونکو ناروغیو مخنیوی دی.
د یادونې وړ ده، چې یاد کمپاین به په راتلونکي اوونۍ کې د لوړ شاولیکوټ ولسوالی ترڅنګ خاکریز، غورک او ارغستان ولسوالیو ته هم وغوځول شي، چې په ترڅ کې به یې زرګونو مالدارانو ته د چنجیو ضد درمل ورکړل شي.