د کندهار د مستهلکینو ګډ کمیسیون له ۶ ټنو څخه ډېر بېکیفیته او تروخت تېر خوراکي توکي ضبط کړه
۳۰ کب ۱۴۰۳ه.ش
۲۰ رَمَضانُ المُبارَک ۱۴۴۶ه.ق
د کندهار ولایت د مقام د ځانګړې لارښوونې پر اساس، د آمر بالمعروف و نهې عن المنکر ریاست په مشرۍ یو ګډ کمیسیون جوړ شوي، چې په ترکیب کې یې د کندهار د کرنې، اوبو لګولو او مالدارۍ ریاست، د صنعت او سوداګرۍ ریاست، مستوفیت، د اقتصاد ریاست، د حکمونو د تعقیب او نظارت ریاست، د پانګونې خونې ریاست، د کندهار ښاروالۍ، د عامې روغتیا ریاست، د نفت او ګازو اداره، د نورم او ستندر اداره او د کندهار امنیه قوماندانۍ استازې شامل دي.
د دې کمیسیون موخه د کندهار ښار په ۱۹ ناحیو کې د خوراکي توکو د نرخونو کنټرول، د احتکار مخنیوی، د بېکیفیته او تروخت تېرو غذایي توکو مخه نیول، او د اړوندو مسؤلینو ته لازمې سپارښتنې کول او ترڅنګ د عامه پوهاوي خپرول دي.
د کندهار د کرنې، اوبو لګولو او مالدارۍ ریاست د مالدارۍ آمریت استازي، ډاکټر توریالي قریشي وویل، چې په تېرو دوو ورځو کې، یاد کمیسیون د کندهار ښار په بېلابېلو ناحیو کې دوه ورځنۍ کډ کمپاین ترسره کړي، د دې کمپاین په ترڅ کې، د سهشنبې په ورځ ۳.۵ ټنه، او د چهارشنبې په ورځ ۳ ټنه بې کیفیته او تروخت تېر خوراکي توکو د پلورولو مخه نیول شوي او ضبط شوي دي.
ښاغلی قریشي زیاتوي، چې د خوراکي توکو تر څنګ، د کرنیزو درملو پلورنځیو او د څارویو کلینیکونو له درمل پلورنځیو هم څارنه کېږي، ترڅو د کرنې او مالدارۍ په برخه کې د نرخونو کنټرول ترسره او د بېکیفیته او تر وخت تیرو درملو پلورلو مخه ونیول شي.
د یادونې وړ ده، چې دغه کمیسیون به په راتلونکي کې هم ورته کمپاینونه پراخ او ترسره کړي، او هیچانه به اجازه ور نه کړي، چې په خپلو پلورنځیو کې بېکیفیته، تروختتېر توکي او درمل وپلوري. همداراز، د نرخونو لوړولو، احتکار مخنیوي او بې کیفیته تر وخت تیر خوراکي توکو ته به جدي پاملرنه کېږي.
