د کندهار دکرنې رییس د مخابراتي خصوصي شرکتونو استازو سره وکتل

د کندهار د کرنې، اوبو لګولو او مالدارۍ رییس الحاج مولوي فضل الباري فضلي په مشرۍ د مخابراتي خصوصي شرکتونو د استازو سره یوه مهمه ناسته ترسره شوه. په دې ناسته کې د کندهار د کرنې رییس ترڅنګ د اجارې عمومي مدیر الحاج مولوي جان محمد جنقدي، د استخباراتو، ولایت مقام، مستوفیت، ښاروالۍ او خصوصي شرکتونو استازو ګډون کړی و.
د غونډې په پیل کې دکندهار د کرنې، اوبو لګولو او مالدارۍ رییس الحاج مولوي فضل الباري فضلي خبرې وکړې. نوموړي په خپلو خبرو کې وویل، چې ټول هغه انتنونه چې د امارتي ځمکو پر سر ولاړ دي، باید امارت ته اجاره ورکړي، تر څو د دوی عاید د امارتي بودیجې برخه شي. هغه زیاته کړه، چې دغه عاید به بیت المال ته ورزیات شي، او امارت هڅه کوي چې د بیت المال حق مستحقو کسانو ته ورسوي.
ښاغلی فضلي زیاته کړه: «امارت تل هڅه کړی، چې خصوصي شرکتونو ته اسانتیاوې برابرې کړي او د هغوی ستونزو ته حل لارې ومومي.» په پای کې نوموړي ټینګار وکړ چې د انتنونو اجارې عاید باید پر وخت تحویل شي.
د دې تر څنګ، د خصوصي شرکتونو استازو د اسلامي امارت له همکارۍ څخه مننه وکړه او ژمنه یې وکړه، چې د امارتي ځمکو پر سر د انتنونو اجارې عاید به ژر تر ژره د امارت بودیجې ته وسپاري.