د کرنې او د خوړو د خوندیتوب د بېړنۍ پروژې غونډه:

د کار د پیل پر تخنیکي مسایلو خبرې او هوکړه وشوه

۱ زمری ۱۳۹۹

د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت‌الله غفوري په مشری د کرنې او د خوړو د خوندیتوب د بېړنۍ پروژې د کار د پیل په تخنیکي مواردو د خبرې اترې په موخه، یوه غونډه په لاره واچول شوه. دغه غونډه د نړیوال بانک او د مالیې وزارت د استازو په شتون کې په لاره اچول شوې وه.

په دې غونډه کې د نوي پروژې پر راتلونکو فعالیتونو لومړنۍ خبرې اترې وشوې او هوکړه وشوه، چې په راتلونکې کې به ددې پروژې د کار د پیل هوکړه لیک لاسلیک او کار یې پیل شي.

د کرنې او د خوړو د خوندیتوب د بېړنۍ پروژې د پلي کېدو چارې د ۱۰۰ میلیونه امرکایي ډالرو په ارزښت، د کوویډ-۱۹ یا کرونا ویروس د منفي اغېزو د مهارولو په پار ډېر ژر پیلیږي.

د اوبولګولو شبکې جوړول، د غنمو د حاصلاتو د لوړولو په پار د غنمو اصلاح شوي تخمونه وېشل او یوشمېر ودانیزې او پراختیایي چارې، د کرنې او د خوړو د خوندیتوب د بېړنۍ پروژې کاري جزیات دي.

په دې غونډه کې د نظر وړ پر فعالیتونو په پرنسیب کې، هوکړه وشوه.