د پکتیکا په ۱۶ ولسوالیو کې د میږو او وزو د طاعون ناروغۍ ضد د ۱۱۲ زره ډوزه واکسین کمپاین پیلېږي
۲۰ چنګاښ ۱۴۰۵ هـ.ش
۲۵ مُحَرَّمُ الحَرام ۱۴۴۸ه.ق
د پکتیکا د کرنې، اوبو لګولو او مالدارۍ ریاست ته دملګرو ملتونو د خوړو او کرنې ادارې «افایاو» له لوري د مالدارۍ د ودې او د څارویو د روغتیا د خوندي کولو په موخه ۱۱۲ زره ډوزه د «پيپيار» ناروغۍ ضد واکسین سپارل شوي، چې ډېر ژر به د ولایت په ۱۶ ولسوالیو کې د میږو او وزو پر اړوندو څارویو تطبیق شي.
د یاد ریاست د مسؤولینو په وینا، دغه واکسین د کوچنیو ژویو د طاعون «پيپيار» ناروغۍ د مخنیوي او کنټرول لپاره ځانګړی شوی او د کمپاین له لارې به زرګونه میږې او وزې تر پوښښ لاندې راشي.
د کرنې ریاست وایي، د دې واکسین د تطبیق اساسي موخه د میږو او وزو د روغتیايي وضعیت ښه کول، د ساري ناروغیو د خپرېدو مخنیوی، د څارویو د تلفاتو کمول او د مالدارانو د اقتصادي زیانونو راټیټول دي.
د یادونې وړ ده، چې د«پيپيار» ناروغي د کوچنیو ژویو له خورا خطرناکو ساري ناروغیو څخه ده او واکسین کول یې د مخنیوي تر ټولو اغېزمنه او باوري لاره ګڼل کېږي. د همدې موخې لپاره د پکتیکا د کرنې، اوبو لګولو او مالدارۍ ریاست له ټولو مالدارانو غوښتنه کړې، چې د واکسین د تطبیق له ټیمونو سره بشپړه همکاري وکړي، څو د څارویو د روغتیا ساتنې او د مالدارۍ د ودې لپاره ټاکل شوي اهداف په بریالیتوب سره ترلاسه شي.
