د هلمند ګرمسېر کې لسګونه بزګران وروزل شول
٩ سلواغه ۱۴۰۲ه.ش
١٧ رَجَب المُرَجَّب ۱۴۴۵ ه.ق
دهلمند ولایت د کرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د جک مؤسسې په مالي همکارۍ، په ګرمسېر ولسوالی کې ٨٠ تنو بزګرو ته د اصلاح شویو غنمو د کروندو د ښې روزنې په اړه زده کړې ورکړي دي.
دغه زده کړې هغو بزګرانو ته په لاره اچول شوې وه، چې څه موده وړاندې ورته د غنمو اصلاح شوي تخمونه او کیمیاوي سرې ورکول شوي دي.
د دې زده کړو په لړ کې یادو بزګرانو ته د نوې او پرمختللې کرکېلې لارې چارې، د غنمو کروندو ته د اړتیا وړ اوبو او کیمیاوي سرې ورکونې، د نباتي ناروغیو مخنیوی، د بې ګټې وښو له منځه وړلو او حاصلاتو راټولولو په اړه روزنه ورکړل شوي دي.
ددې پروګرام موخه د بزګرانو وړتیاوې لوړول او په ټوله کې د کرنې ودې او پراختیا ته زمینه برابرول دي.
