د هلمند بولان څېړنیز فارم کي د غنمو مورنیو او هستوي تخمونو حاصلاتو راټولولو چارې پیل شوې
٢۷ غویی ۱۴۰۲ه.ش
٢۷ شَوّال المُکَرَّم ۱۴۴۴ ه.ق
د هلمند ولایتد کرنې، اوبولګولو او مالدارۍ ریاست اړوند د کرنیزو څېړنو مدیرت فني او مسلکي کارمندانو لخوا د بولان څېړنیز فارم کې د مورنيو او هستوي تخمونو او تجاربو باندې څېړنې ترسره شوي دي، چې دا مهال یې د حاصلاتو راټولولو چارې پیل شوې.
په یادو څېړنو کې چي ملي او بین المللي تجربې پکې شاملې دي د غنمو د اصلاح، اګرانومۍ او نباتي ناروغیو ٩ سیټونه شامل دي، چې د پلان له مخي به هستوي او مورني تخمونه ورڅخه په لاس راوړل شي.
په یادو څېړنو کي د غنمو نبات باندې د نباتاتو د اصلاح په برخه کي ٣ بین المللی تجربې، چي ۱۴۰ لینونو کي کرل شوي و او ٥ سیټه ملي تجربې، چي ۵۰ لینونه او د اګرانومۍ تجربه چې د اوبو تاثیر د غنمو په حاصلاتو باندې ارزول کیږي شامل دي.
همداراز یو سیټ د ناروغیو د مطالعې تجربه چي د غنمو د ناروغیو په مقابل کي د ښه مقاومت په موخه تر تحقیق لاندې نیول شوي و په ۵۰ لینونو کې کرل سوي و چې تر څېړنو او تحقیق وروسته به یې ښه لینونه په ورایټیو بدلې او معرفي شي.
ددې تر څنګ لوړ حاصل او مقاومي د غنمو ۹ ورایټۍ د مورني تخمونو تولید په منظور په شل جریبه ځمکه کي په فني ډول کرل شوي و او تر روزنې وروسته حاصلاتو ته رسېدلي دي.
د یادو څېړنیزو قطعاتو او هستوي مورني تخمونو د کرني او روزني ټول مراحل د فني او مسلکي کارمندانو لخوا ترسره شوي دي.
د هلمند د کرنې ریاست پلان لري، چې هلمند کې د بېلابېلو نباتاتو، حبوباتو، سبو او مېوه جاتو د تخمونو د اصلاح، ترویج او تکثیر په برخه کي د خپلو مسلکي کارمندانو په مټ کار وکړي ترڅو له مخې یې د ځمکوالو حاصلات لوړ او د قناعت وړ عاید ترلاسه کړي.
