د نیمروز ولایت په دوو ولسوالیو کې ٧ زره کسانو ته د کار زمینه برابره شوې
۲ وږی ۱۴۰۲ه.ش
۷ صَفَرُ المُظَفَّر ۱۴۴۵ه.ق
د نیمروز ولایت دکرنې، اوبولګولو او مالدارۍ ریاست چارواکي وايي، چې ددې ولایت په دلارام او خاشرود ولسوالیو کې د ملګرو ملتونو دخوړو او کرنې ادارې په مالي او د افغانستان د راتلونکو نسلونو پروژې په تخنیکي مرسته د سېلابونو له امله د کرنيزو ځمکو د تخریب د مخنیوي او د ولسوالیو اوسېدونکو ته د کاري بوختیا له امله، تر ٧ زره زياتو کسانو د کار زمينه برابره شوې ده.
ياده پروژه په دلارام ولسوالی کې د پټۍ په پریکولو سره، چې پرمهال د همدې ولسوالۍ ولسوال، حاجي ملا ګلنبي نافذ، د نيمروز د کرني، اوبولګولو او مالدارۍ رییس، حاجي مولوي عبدالخالق حکيمالله، د پلي کوونکي پروژې چارواکو، د یادې ولسوالی یو شمېر علمايکرامو قومي مشرانو او اوسېدونکو په شتون کې، پرانېستل شوه.
د نیمروز د کرنې، اوبولګولو او مالدارۍ ریيس، حاجي مولوي عبدالخالق حکیمالله وویل، د سېلابونو له امله د دوو ولسوالیو د کرنيزو ځمکو او د عامو خلکو د استوګنیزو کورنو د تخریب د مخنيوي، ولسونو ته د کار د زمینه برابرولو او د ځمکې لاندې د اوبو د پياوړي کولو په موخه یاده پروژه پلي کېږي.
د ښاغلي حکیمالله په خبره، چې د دلارام ۴۴۰۴ تنو اوسېدونکو او د خاشرود ۲۸۲۰ تنو اوسېدونکو ته د ۲۰ ورځو لپاره د کار زمینه برابره شوې او هره ورځ هر تن ته شاوخوا ۴۰۰ افغانۍ ورکول کېږي.
د کرنې رییس د مؤسسې مسؤولینو ته په رښتنې توګه، د ښه او باکیفیته کار سپارښتنه وکړه.
په نیمروز کې د د افغانستان د راتلونکي نسل د مؤسسې مسؤول، سیدحضرت علوي د پروژې د تطبيق په تړاو وویل، کې د یو میلیونو ٨٧٨ زره او ۴۳۴ امريکايې ډالرو په ارزښت په دوو ولسوالیو کې پروژه پلي کېږي.
د ښاغلي علوي په خبره چې د يوميليون ډالرو په شاوخوا د پروژې تخنیکي لګښت او پاته پیسې د ټاکل شویو کارګرو دي، چې روزانه په کار بوخت دي.
په ورته مهال د دلارام ولسوال، حاجي ملا ګلنبي نافذ د پروژې د پیل په موخه خوښ دی او د اړوندو مسؤولینو سره د پوره همکارۍ ډاډ ورکوي.
حاجي عبدالمالک او امان الله د دلارام ولسوالۍ اوسېدونکي بیا دا ډول پروژې ګټوري يادوي، د اسلامي امارت څخه د خوښې ترڅنګ د پوره همکاریو ډاډ ورکوي.
د دوی په خبره چې په تېرو کلونو کې یادې ولسوالی ته هېڅ ډول پاملرنه شوې نه ده خو د اسلامي امارت د حاکمیت وروسته دلته ډېر خدمات وړاندې کېږي.
