د ننګرهار وادي کرنیز شرکت؛ په هډې فارم کې ۵۰۰ جریبه د مالټې نوې بڼونه حاصل ته رسېدلي

۴ لیندۍ ۱۴۰۴ هـ.ش
۴ جُمَادَى الثانی ۱۴۴۷ هـ.ق
د ننګرهار وادي کرنیز شرکت اړوند د هډې فارم په عبدالخېلو بلاک کې د ۵۰۰ جریبو په کچه د نوو مالټو بڼونو حاصل اخیستل پیل شوي، چې له ډېرې مودې وروسته د سیمې د زرغونتیا، اقتصاد او کارموندنې په برخه کې د پام وړ بدلون رامنځته شوی دی.
د ننګرهار وادي کرنیز شرکت چارواکي وايي، د هډې فارم په عبدالخېلو بلاک کې په ۵۰۰ جریبه ځمکه تازه د مالټې بڼونه ثمر ته رسېدلي او د سیمې پر اقتصاد یې د مثبت اغېز څرک ښکاري.
یاده ځمکه چې له کلونو وروسته بېرته احیا شوې، اوس د مالټو ترڅنګ په ۲۰ جریبه کې لیمو او په سلګونو جریبو کې نور کرنیز فصلونه هم کرل شوي دي.
مسؤلین وايي، د دغو بڼونو له برکته د سیمې اقتصادي ارزښت لوړ شوی، پراخه شنه سیمه رامنځته شوې او لسګونو هېوادوالو ته د موسمي او دوامدار کار زمینه برابره شوې ده.
تر بڼونو ور هاخوا، په دغه بلاک کې منظم تفریحي ځایونه، سړکونه، چمنونه او د ناستې ځایونه هم جوړ شوي، چې سیمې ته یې نوې ښکلا او منظره ورکړې ده.
عبدالخېل بلاک د ننګرهار د خېوی ولسوالی اړوند یوه منظمه او ښکلی سیمه ده، چې د هډې فارم د پراختیايي پروژو له پیل وروسته د کرنیزو فعالیتونو او پانګونې نوې مرکز ګرځېدلې. د سیمې د کرنیزو ځمکو احیا، د مېوو بڼونو پراخوالی او د تفریحي سیمو جوړېدو د دې لامل شوي، چې عبدالخېل بلاک د ننګرهار د کرنې او چاپېریال د ښکلا یو مخکښ سیمیز ماډل بلل شي.