د ننګرهار هسکه مېنه کې د واټرشیډ او کانال جوړولو چارې روانې دي؛ ۸۰۰ جریبه ځمکه به خړوبه شي
۱ وږی ۱۴۰۵ هـ.ش
۹ رَبِیعُ الْأَوَّل ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په هڅو او د ډنمارک د کډوالو شورا «ډيارسي» په مالي ملاتړ، د هسکې مېنې ولسوالی د خم کلي د واټرشیډ پروژې چارې په چټکۍ سره روانې دي.
د یادې پروژې له پلي کېدو سره ۲۳۶ تنو ماهرو او غیرماهره کاریګرو ته د ۳۰ ورځو لپاره د کار زمینه برابره شوې، چې له ډلې یې ۵۰ تنو کاریګرو ته د کار په بدل کې نغدي پیسې هم ورکړل شوې دي.
د ننګرهار د کرنې، اوبو لګولو او مالدارۍ رییس مولوي عبدالستار محمد وايي، د هسکې مېنې ولسوالی د غوښت درې کلي د کانال جوړولو چارې هم روانې دي. د نوموړي په وینا، تر دې مهاله په دې پروژه کې سربند، یو شمېر اړین ودانیز جوړښتونه او ۲۵۰ متره اوږد کانال جوړ شوی دی.
نوموړي زیاته کړه، د اړتیا له مخې به د غوښت درې کانال په پروژه کې نور اړین ودانیز جوړښتونه هم رامنځته شي، څو د اوبو د لېږد او مدیریت بهیر لا پیاوړی شي.
د ننګرهار دکرنې رییس د معلوماتو له مخې، د غوښت درې د کانال او واټرشیډ پروژو په بشپړېدو سره به شاوخوا ۸۰۰ جریبه کرنیزه ځمکه خړوبه شي، چې له امله به یې د اوبو د مدیریت، د کرنیزو ځمکو د خړوبولو او د اوبو لګولو په برخه کې د پام وړ اسانتیاوې رامنځته شي.
د دغو پروژو اساسي موخه د اوبو ښه مدیریت، د اوبو د ضایعاتو مخنیوی، د اوبو لګولو سیستم پیاوړتیا او د کرنیزو ځمکو د خړوبولو لپاره د مناسبو اسانتیاوو برابرول دي. تمه ده، چې د پروژو په بشپړېدو سره به د سیمې د کروندګرو د اوبو ستونزې تر یوه بریده هوارې او د کرنیزو فعالیتونو زمینه لا پیاوړې شي.
