د لغمان دوو ولسوالیو کې ننداریز بڼونه جوړېږي
١٠ سلواغه ۱۴۰۲ه.ش
١٨ رَجَب المُرَجَّب ۱۴۴۵ ه.ق
لغمان د کرنې، اوبولګولو او مالدارۍ ریاست د ډاکار مؤسسې په همکارۍ ددې ولایت د الینګار او علیشنګ ولسوالیو کې په شل جریبه ځمکه کې د املوکو او مالټو د ننداریز بڼونو د جوړلو چارې پیل کړې.
د چارواکو په خبره ددغو بڼونو لپاره شل بزګران وار دمخه د کرنې ریاست او همکارې مؤسسې د کارمندانو په همغږي انتخاب او اوس پر دوی د یادو ونو نیالګي وېشل شوي دي.
د لغمان دکرنې ریاست چارواکي وایي، چې د یو جریب لپاره ۸۰ ، ټولټال ۱۹ جریبه ځمکې لپاره ( ۱۵۲۰ ) د املوکو او یو جریب ځمکې لپاره ۸۰ د مالټې نیالګي وېشل شوي دي.
دغه راز پر یادو بڼوالو د نیالګیو ترڅنګ یوریا او ډی ای پي سره هم وېشل شوي دي.
د ډاکار مؤسسې د بڼوالۍ برخې مسؤل انجنیر روح الله امین وویل، چې د یادو بڼوالو د حمایت او ملاتړ لپاره به ورسره پاتې شو ترڅو وشي کولای د بڼوالۍ ټولې چارې په مسلکې بڼه ترسره او زیات حاصلات ترلاسه کړي، ددي ترڅنګ به ورته د بڼوالۍ لپاره اړینې توکي هو ورکړل شي.
د یادو ننداریزو بڼونو د جوړولو موخه د بڼوالۍ پراختیا، د بزګرانو هڅونه، د بڼوالۍ عصري کول او په ټوله کې د کروندګرو اقتصادي ودې ته زمینه برابرول دي.
