د بڼوالۍ ځنځیري ارزښت د پراختیا پروژه لوګر کې د پیازو ۹۱ زېرمتونونه جوړوي
۲۷ لړم ۱۳۹۹
د کرنې وزارت دبڼوالۍ ځنځیري ارزښت پروژه، د لوګر په ولایت کې د پیازو د ۹۱ زېرمتونونو رغنیزې چارې ۹۵ سلنه بشپړ کړي دي او ټاکل شوې، چې تر راتلونکو لسو ورځو بشپړ او ګټې اخیستنې ته وسپارل شي.
ددغو زېرمتونونو د جوړولو پروژه د کرنیزو محصولاتو مدیریت د پروژې له خوا په لاره اچول شوې ده.
د پیازو د غه زېرمتونونه د ۴۴میلیونه او ۸۰۲زره او ۷۵۸ افغانیو په لګښت د لوګر ولایت په مرکز او ددې ولایت په محمدآغې ولسوالۍ کې جوړیږي. ددې لګښت ۸۰ سلنه د کرنې وزارت او ۲۰ سلنه نور یې برخمن شویو بزګرانو له خوا ورکول کیږي.
دغه زېرمتونونه هر یوه یې ۱۲ مټریک ټنه وړتیا لري.
له دغو زېرمتونونو څخه په ګټې اخیستنې سره، د لوګر بزګران کولای شي، چې دکال یوزر او ۹۲ مټریک ټنه پیاز زېرمه کړي.
دا په داسې حال کې ده، چې د کرنې، اوبولګولو او مالدارۍ وزارت د احصایې او معلوماتو ریاست د شمېرو له مخې په ۱۳۹۸یم کال کې د لوګر دپیازو د کروندو کچه ۹۰۰ هکټاره وه او د تولید کچه یې ۱۸زره او ۹۰۰ مټریک ټنو ته رسېدلې وه.
