دکرنې وزارت د اوبولګولو او طبیعي سرچینو مرستیال د کندهار له والي سره وکتل

۲۴مرغومې ۱۳۹۹
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري، کندهار ولایت ته دخپل سفر په ترڅ کې، ددې ولایت له والي روح الله خانزاده سره وکتل او په دې ولایت کې د کرنې، بڼوالۍ او مالدارۍ د پراختیا، راتلونکو برنامو او د پروژو د ښې ګټې اخیستنې په پار هر اړخیزې خبرې وکړې.
په دې لیدنه کې د کندهار والي په دې ولایت کې د کرنیزو پروژو د پلې کېدو په هکله خبرې وکړې او د هغې پاملرنې له امله چې د کندهار ولایت کرنې اومالدارۍ ته شوي دي، د کرنې له وزارت څخه مننه وکړه. ښاغلی خانزاده وویل، د کندهار ولایت دکرنې، اوبولګولو، بڼوالۍ اومالدارۍ په برخه کې یولړ کړنې ترسره شوي دي خو اړتیا ده، چې د یادو برخو  پراختیا ته لاډېرې پاملرنې ووشي ترڅو په دې برخه کې پانګونې ډېرې شي او د اوزګارتیا کچه ټیټه شي.
په همدې حال کې د کرنې وزارت د اوبولګولو او طبیعي سرچینو مرستیال حشمت الله غفوري وویل، چې کندهار د مېوو د تولید له پلوه ستر تولیدوونکی ولایت دی او د کرنې وزارت ژمن دی، چې په دې برخه کې د کندهار کروندګرو او بڼوالو سره هر اړخیزې مرستې او همکارۍ وکړي.
ښاغلی غفوري وویل، چې راتلونکی کال د کرنیزو محصولاتو مدیریت د پروژې د غځېدو ترڅنګ، د کندهار په ولایت کې به یوشمېر نورې پروژې هم پلي او بېلابېلو برخو ته به پاملرنه ووشي.