دهلمند مرکز لښکرګاه کې د کبانو غیرقانوني ښکار کوونکی ونیول شو

۱۶ زمری ۱۴۰۴ هـ.ش
۱۳ صَفَر المُظَفَّر ۱۴۴۷ هـ.ق
دهلمند ولایت مرکز لښکرګاه اړوند د بولان درود په سیمه کې یو تن هغه کس ونیول شو، چې د عمومي سیند د طبیعي کبانو ښکار یې کاوه.
یاد کس د هلمند ولایت د کرنې، اوبولګولو او مالدارۍ ریاست د حیواني روغتیا او مالدارۍ آمریت اړوند کارکوونکو له‌خوا د ساحوي څار پر مهال ونیول شو. د طبیعي کبانو ښکار نه‌یوازې د محیطي توازن لپاره زیانمن دی، بلکې د کبانو نسل هم له جدي ګواښ سره مخ کوي.
د هلمند د کرنې ریاست مسؤلینو وویل، چې د کبانو ښکار د امراؤ د هدایت له مخې منع دی، او له ناقانونه ښکار کوونکو سره به قانوني چلند کېږي.
همداراز، د حیواني روغتیا آمریت له لوري یادو کسانو ته لازمې توصې وشوې، او ورسره یې د عامه پوهاوي په موخه د کبانو د نسل ساتنې، د چاپېریال ارزښت، او قانوني مکلفیتونو په اړه تفصیلي معلومات ورکړل شول.
د هلمند د کرنې ریاست له ټولو ښاریانو، کروندګرو او کب روزونکو څخه غوښتنه کوي، چې د طبیعي سرچینو ساتنې ته ځانګړې پاملرنه وکړي، او د کبانو د ښکار له قانوني اصولو سرغړونه ونه‌کړي.
د یادونې وړ ده، چې د هلمند ولایت د سیندونو او طبیعي اوبو کبان د دې ولایت یوه مهمه طبیعي پانګه ګڼل کېږي، چې ساتنه یې د هر وګړي مسؤلیت دی.