دننګرهار وادي کرنیز شرکت د درېیم فارم اړوند ۲۲مې ویالې د پاکولو چارې عملاً پیل شوې
۲۵ وری ۱۴۰۴ ه.ش
۱۶ شَوّالُ المُکَرَّم ۱۴۴۶ه.ق
د ننګرهار وادي کرنیز شرکت د درېیم فارم د آمر مولوي محمد ګل مطمئین او د یاد فارم د مسؤلینو د هڅو او له خصوصي کرنیزو شرکتونو سره د ښې همغږۍ په نتیجه کې، نن د درېیم بلاک اړوند د ۲۲مې ویالې د پاکولو چارې عملاً پیل شوې.
یاده ویاله، چې د درېیم بلاک کرنیزې ځمکې او مالټې باغونه ترې خړوبېږي، د خصوصي قراردادي زراعتي شرکتونو په مالي لګښت له رسوباتو پاکېږي. د دې چارې موخه د اوبو د جریان ظرفیت لوړول، کرنیزو ځمکو ته د اوبو منظم رسېدل، د اوبو ضایعاتو مخنیوی او د سړکونو او طبیعي ساحو له تخریب څخه وقایه ښودل شوې ده.
د درېیم فارم آمر ټولو قراردادي کرنیزو شرکتونو او بزګرانو ته لارښوونه کړې چې د یاد بهیر د پیاوړتیا لپاره خپله فعاله ونډه واخلي، څو د کرنیزو خدمتونو موثریت زیات او د اوبو د مدیریت سیستم لا ښه شي.
ویالې د کرنیزو ځمکو د خړوبولو مهمه وسیله ده. د وخت په تېرېدو سره د رسوباتو له امله د دغو ویالو د ظرفیت کمېدل، د اوبو د نه منظم رسیدو، زیانمنو سطحو او چاپېریالي ستونزو لامل ګرځي. د دغو ویالو پاکول د پایدارې کرنې او د اوبو د مؤثر مدیریت لپاره حیاتي ارزښت لري.
