د پکتیکا سروبي ولسوالی کې طبیعي پېښې ځنګلونو او د بڼوالۍ محصولاتو ته زیانونه اړولي
۷ چنګاښ ۱۴۰۱ ه.ش
۲۹ ذوالقعده ۱۴۴۳ ه.ق
د پکتیکا دکرنې، اوبولګولو او مالدارۍ ریاست وایي، چې ددې ولایت د سروبي په ولسوالی کې د طبيعي پېښو له وجې ځنکلونو او د بڼوالۍ محصولاتو ته درانه زیانونه رسېدلي دي.
د دوی په خبره په دې ولسوالی کې د اسماني تندر له وجې د جلغوزیو څه باندې ۴۰ غټې ونې له منځه تللي دي.
د پکتیکا دکرنې ریاست ددې پېښې د ارزونې په پار یاده سیمه تې د سروبي ولسوالی د کرنې مدیر مولوی سلطان محمد ثاقب په مشرۍ یو باصلاحیته پلاوی لېږلی دی، چې سیمه له نږدې سروې او له قومي مشرانو سره د ځنګلونو د خوندي کولو او پراختیا په پار خبرې وکړې.
د یادونې وړه ده، چې موده مخکې په یاده ولسوالی کې د ږلۍ له وجې نږدې ۳۵۰ جریبه د بڼوالۍ محصولات هم له منځه تللي دي.
د پکتیکا دکرنې ریاست هلې ځلې کوي، چې له طبیعي پېښو څخه زیانمنو بڼوالو سره د مرستې او همکاریو زمینه برابره کړي.
