لوګر کې د سایلج جوړولو په پار د جوار ننداریزې کروندې جوړېږي
۸ چنګاښ ۱۴۰۰
د لوګر د کرنې، اوبولګولو او مالدارۍ ریاست ددې ولایت د شېدې تولیدوونکو کوپراټیفونو په ۴۲ مالدارو غړو د سایلج جوړلو په پار د جوارو د ننداریزو کروندو جوړولو په موخه د جوارو تخم او کیمیاوي سرې وېشلي دي.
د لوګر د کرنې ریاست وایي، چې دا توکي د کرنې وزارت د خلکو په ګډون دکرنې او مالدارۍ پروژې «CLAP» او د ملګورو ملتونو د خوړو او کرنې ادارې «FAO» په مالي او تخنیکي همکارۍ د لوګر ولایت مرکز پل علم کې وېشل شوي دي.
سایلج د څارویو هغه باکیفیته خوراکي توکي دي، چې تر ډېره د شېدې ورکوونکو غواوو د تغذیې په پار کارول کېږي. د جوارو ننداریزې کروندې هم د سایلج د تولید په پار جوړېږي.
