پکتیا کې د بزګر ورځ یوشمېر بزګرانو ته د ډالیو په روکولو سره ونمانځل شوه

mail-admin
دوشنبه ۱۴۰۰/۱/۹ - ۸:۴۷
پکتیا کې د بزګر ورځ یوشمېر بزګرانو ته د ډالیو په روکولو سره ونمانځل شوه

۹ وری ۱۴۰۰
د پکتیا دکرنې، اوبولګولو او مالدارۍ ریاست له خوا د کرنیز نندارتون په لاره اچولو او بزګرانو ته د ډالیو په ورکولو سره د وري دویمه د بزګر ملي ورځ په ځانګړو مراسمو ونمانځل شوه.
په دې مراسمو کې د پکتیا والي محمد حلیم فدايي، دکرنې رییس انجنیر محمد دین مومند، د ولایتي شورا استازی جنت خان څمکنی د پکتیا د بېلابېلو ادارو رییسانو، بزګرانو، مالدارانو، قوریه لرونکو، خبریالانو او د کرنې ریاست همکارو برنامو مشرتابه او غړو ګډون کړي وو.
د غونډې په پیل کې د پکتیا دکرنې رییس انجنیر محمد دین مومند د بزګر ملي ورځې د مبارکۍ ترڅنګ د کرنې وزير ښاغلي انوارالحق احدي پیغام ګډونوالو ته واورول. ښاغلی مومند د پکتیا دکرنې ریاست د تېرکال لاسته راوړنې او د راتلونکي کال پلانونه هم له ګډونوالو سره شریک کړل.
د پکتیا دکرنې رییس وویل، چې بزګران د خپلو هڅو او زیار پر مټ له خپلو کروندو څخه خلکو ته خواړه او صنعت ته اومه مواد چمتو کوي، دوی د هېواد د اقتصاد په لوړولو کې رغنده رول لوبوي. هغه بزګرانو سره د دوامدارو همکاریو ژمنه هم وکړه.
د بزګر د ورځې په دغه غونډه کې د پکتیا والي محمد حلیم فدايي هم خبرې وکړې او بزکران یې د ګران هېواد اصلي جوړوونکي او اتلان وګڼل او زیاته یې کړه: «بزګران د وطن اصلي جوړوونکي دي، دوی د خولو په تویولو او د لاسونو په تڼاکې کولو سره هېواد آباد کړي، ژمن یوو چې پکتیا ولایت کې به بنسټیزې پروژې پلي کړو او ولسونو ته به هوساینه رامنځته کړو، څرنګه چې زموږ د هېواد اقتصاد په کرنه او مالدارۍ ولاړ دی، نو لازمه ده چې یادې برخې ته ځانګړې پاملرنه وکړو، تر څو په ځان بسیا او د نورو له احتیاجه خلاص شو.»
ښاغلی فدايي، د پکتیا د کرنې رییس او کارکوونکو هڅې او کړنې له دې امله وستایلې، چې د پکتیا بزګرانو او مالدارنو ته په خپله برخه کې ارزښتناکې چوپړتیاوې وړاندې کړي دي.
د بزګر مېلې او کرنیز نندراتون په دغو شاندارو مراسمو کې ډول ډول نندارې د مختلفو ټیمونو لخوا ترسره شوې او هم د پکتیا ولایت اړوند تولید شوي کرنیز او مالدارۍ محصولات چې په لسګونو غرفو کې اېښودل شوي ول، نندارې ته وړاندې شول. په پای کې بزګرانو ته بېلابېلې ډالۍهم د کرنې ریاست له خوا ورکړل شوې.

 

تازه ترین اخبار

شنبه ۱۴۰۵/۸/۳۰ - ۱۶:۱۳
Background image

ننګرهار کې ۱۰۰ تنو د ستروسو او سبو پروسس کوونکو ته د ۲.۶ میلیونه افغانیو په ارزښت وسایل ووېشل شول

۳۰ لړم ۱۴۰۵ هـ.ش
۱۰ جُمَادَى الثانی ۱۴۴۸ هـ.ق
د ننګرهار ولایت د کرنې، اوبو لګولو او مالدارۍ ریاست په هڅو، د «ډاکار» مؤسسې په تخنیکي همکارۍ او د ملګرو ملتونو د نشه‌یي توکو او جرمونو سره. . .

چهارشنبه ۱۴۰۵/۸/۶ - ۱۱:۵
Background image

نورستان کې سلګونو اړمنو بزګرانو ته د اصلاح شویو تخمونو او کیمیاوي سرو د وېش لړۍ پیل شوه

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د نورستان ولایت د کرنې، اوبو لګولو او مالدارۍ ریاست په همغږۍ، د خوړو او کرنې نړۍوالې ادارې «اف‌اې‌او» په مالي ملاتړ او د «اې‌وای‌اس‌او» مؤسسې. . .

چهارشنبه ۱۴۰۵/۸/۶ - ۹:۳۰
Background image

ننګرهار کې د غنمو ننداریزو کروندو لپاره اصلاح شوي تخمونه او کیمیاوي سرې ووېشل شوې

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په تخنیکي همکارۍ او د کرنې وزارت په مالي ملاتړ، د دغه ولایت په اوو ولسوالیو کې د غنمو ننداریزو. . .

بازگشت