د کرنیزو محصولاتو مدیریت او د بڼوالۍ ځنځیري ارزښت د پروژو لاسته راوړنې دکرنې وزیر ته وړاندې شول

content_admin
یکشنبه ۱۳۹۹/۱۰/۲۱ - ۱۵:۴۸
د کرنیزو محصولاتو مدیریت او د بڼوالۍ ځنځیري ارزښت د پروژو لاسته راوړنې دکرنې وزیر ته وړاندې شول

۲۱مرغومې ۱۳۹۹
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري د کرنیزو محصولاتو مدیریت برنامې او د بڼوالۍ ځنځیري ارزښت د پراختیا پروژې د چارواکو په شتون کې، په ۱۳۹۹یم مالي کال کې د یادو پروژو د فعالیتونو او لاسته راوړنو په هکله د کرنې وزیر ډاکټر انوارالحق احدي ته مالومات وړاندې کړه.
ښاغلی غفوري وویل، چې په هېواد کې د کرونا وبا له خپرېدوسره سم د کرنیزو محصولاتو مدیریت، د یوشمېر مهمو کرنیزو محصولاتو د خوساکېدو د مخنیوي او هېوادوالو ته د کاري زمینې برابرولو په پار نږدې شپږ میاشتې وړاندې د هېواد په ۳۴ ولایتونو کې د کرنیزو محصولاتو مدیریت پروژه په لاره واچول شوه. ښاغلی غفوري وویل، چې یاده پروژه د کرنې وزارت له خوا طرحه او په ټول هېواد کې پلی شوی دی.
د کرنې وزارت د اوبولګولو او طبیعي سرچینو مرستیال زیاته کړه، چې په ټولیزه توګه د هېواد په کچه د کرنیزو محصولاتو مدیریت د برنامې له لارې ۱۰زره او ۸۲۸ ودانۍ جوړې شوي دي، چې په کې ممیزخونې، د پیازو او کچالو زېرمتونونه او دغه راز د مڼو او انارو ساتنې په پار صفر درجې سړې خونې شامل دي.
حشمت الله غفوري دغه راز زیاته کړه، چې د ۱۳۹۹یم مالي کال په ترڅ کې د بڼوالۍ ځنځیري ارزښت د پراختیا پروژې له لارې هم په ۱۱ ولایتونو کې په ټولیزه توګه یوزر او ۹۷ پروژې، چې په کې ممیزخونې، د پیازو او کچالو زېرمتونونه او د مڼو او انارو صفردرجې سړې خونې جوړول او ترڅنګ یې په دغو ولایتونو کې پر یوشمېر مېرمنو د مېوو او سبو لمریز وچوونکي دستګاوو وېش شامل دي پلي شوي دي.
د اوبولګولو او طبیعي سرچینو مرستیال زیاته کړه، چې ددغو پروژو په پلي کېدو سره ۸۷زره کسانو ته لنډمهالې دندې او ۲۹ زره کسانو ته د دایمې دندې زمینه برابره شوې ده. د هغه په خبره، د دغو پروژو د ودانیزو چارو په بشپړېدو سره، څه باندې ۱۶۵زره مټریک ټنه کرنیز محصولات چې په کې مڼې، انګور، انار، پیاز، کچالو او یوشمېر نور محصولات شامل دي خوندي شوي او عمریې اوږد شوي دي.
په همدې حال کې، د کرنې وزیر ډاکټرانوارالحق احدي د کرنیزو محصولاتو مدیریت د برنامې او د بڼوالۍ ځنځیري ارزښت د پراختیا پروژې له مشرتابه او کارکوونکو څخه د قدردانۍ او مننې ترڅنګ وویل، چې یادې پروژې په لږه موده او غیرنورمال حالت او کرونایي حال کې، د هېواد په ۳۴ ولایتونو کې پلي شوي دي، چې له شک پرته اغېزمنتوب یې ډېر دي. ښاغلی احدي وویل، چې د یادو پروژو دطرحې او چارو په پرمختګ کې نوښت شتون درلود، چې په لږه موده کې، د هېواد په کچه د کرنیزو محصولاتو ساتنې په پار ډېرې ودانۍ جوړې شوي دي.
دکرنې، اوبولګولو او مالدارۍ وزیر په ۱۴۰۰ام مالي کال کې د کرنیزو محصولاتو مدیریت د پروژې لپاره د بودیجې د زیاتولو غوښتنه وکړه او په ورته وخت کې، د خپلو لارښوونیزو نظریاتو وړاندې کولو ترڅنګ، سپارښتنه وکړه، چې په ۱۴۰۰ام مال کال کې د پروژې د پروخت پلي کېدو په پار په مرکز او لایتونو کې هغږۍ زیاتې او چټکې شي.
 

تازه ترین اخبار

دوشنبه ۱۴۰۴/۷/۱۴ - ۱۴:۲۹
Background image

پنجشېر کې د لوبیا حاصلات زیات شوي 

۱۴ تله ۱۴۰۴ هـ.ش
۱۳ رَبِیعُ الْثاني ۱۴۴۷ هـ.ق
د پنجشېر د کرنې، اوبو لګولو او مالدارۍ ریاست اعلان کړی، چې په روان کال کې د دې ولایت د لوبیا حاصلات د تېر کال په پرتله پنځه سلنه زیات شوي. . .

دوشنبه ۱۴۰۴/۷/۱۴ - ۱۱:۲۳
Background image

میدان وردګو کې د ګیلاسو حاصلات ډېر شوي 

۱۴ تله ۱۴۰۴ هـ.ش
۱۳ رَبِیعُ الْثاني ۱۴۴۷ هـ.ق
د میدان وردګو د کرنې، اوبو لګولو او مالدارۍ ریاست ویلي، چې په روان کال کې له دې ولایت څخه له ۲۰۴۰ متریک ټنه زیات دګیلاسو حاصلات ترلاسه شوي. . .

دوشنبه ۱۴۰۴/۷/۱۴ - ۱۱:۱۱
Background image

د وچکالۍ پر وړاندې د اسلامي امارت عملي ګامونه؛ روزګان کې د درې میلیونه افغانیو په ارزښت د چک ډېم چارې پیل شوې

۱۴ تله ۱۴۰۴ هـ.ش
۱۳ رَبِیعُ الْثاني ۱۴۴۷ هـ.ق
د کرنې، اوبولګولو او مالدارۍ وزارت د ځانګړې بودیجې په لګښت د روزګان ولایت د ترینکوټ اړوند د ناقیل په سیمه کې د اوبو د مهار او د وچکالۍ د. . .

بازگشت