پروان کې د سبزوار حوض او کانال د څه باندې ۱۲.۸ میلیونه افغانیو په لګښت جوړ او ګټې اخیستنې ته وسپارل شول

۹ لیندۍ ۱۳۹۹
د کرنې، اوبولګولو او مالدارۍ وزارت د پروان ولایت د سیاه ګرد ولسوالۍ د سبزوار د اوبولګولو کانال او حوض جوړ او عملاً ګټې اخیستنې ته وسپارل.
د کرنې، اوبولګولو او مالدارۍ وزارت د اوبولګولو ریاست چارسمبال خلیل الرحمن عمر وایي، چې د سبزوار حوض د ۵۰ پر ۴۰ مترو پراخوالي سره، په یوه جریبه ځمکه کې رغول شوې ده. ښاغلی عمر زیاته کړه، چې یاد حوض د درې زره او ۸۰۰ متر مکعب اوبو د زېرمه کولو وړتیا لري.
د اوبولګولو ریاست د چارسمبال په خبره، یاد حوض او ورسره کانال یې، ۲۴۰ جریبه ځمکه خړوبوي او په نېغه ورڅخه ۳۵ کورنۍ ګټه پورته کوي.
د دغو زېربناوو دجوړولو ټولیز لګښت ۱۲ میلیونه او ۸۰۷ زره او ۴۱۰ افغانۍ ده.