په درېوو شمالي ولایتونو کې د بدیل معیشت د یوې پروژې درې کلن لاسته راوړنه: پرڅلور زره او ۶۹۰ بزګرانو د صنعتي نباتاتو د تخمونو وېش
۳۱ وږی ۱۳۹۹
د اکټیډ « ACTED» موسسې د «بدیل» پروژه، چې د «UNODC»له خوا تمویلیږي، د بلخ، جوزجان او سمنګان په ولایتونو کې د یادو ولایتونو د کرنې ریاستونو په همغږی، د درېوو کلونو په لړ کې پر څلور زره او ۶۹۰ بزګرانو د روغني نباتانو تخمونه او کیمیاوي سرې وېشلي دي او دغه راز روزنیزې برنامې یې هم په لاره اچولي دي.
دغه راز یاده پروژه د صنعتي نباتاتو د تلپاتې تولید او په دې برخه کې دبازارموندنې په موخه د صنعتي نباتاتو ۱۳ ټولنې هم جوړې کړي دي.
په همدې حال کې، یادو ټولنو ته د صنعتي نباتاتو یا غوړیو اړونده بوټو د غوړیو د پروسس په موخه د پروسس ۱۳ ماشینونه چمتو کول او د دوی په واک کې ورکول؛ د غوړیو اړونده بوټو تولیدوونکو لپاره ددې پروژې نور کارونه دي. په درېوو شمالي ولایتونو کې صنعتي نباتاتو تولیدوونکو سره ددې پروژې نورې مرستې، د صنعتي نباتاتو د تولیدوونکو له خوا د تولید شویو غوړیو د بسته بندی په پار اووه زره او ۲۰۰ درې او پنځه لیټره تش بوتلونو وېشل دي.
د مېرمنو د ملاتړ په موخه، پر ۴۰۰ مېرمنو د چرګانو روزنې اړونده کڅوړې وېشل، پر هرې مېرمنې ۳۰ چرګان، د چرګانو خوراکي توکي د اکټیډ « ACTED» موسسې د «بدیل» پروژې نورې چارې دي. دغو مېرمنو ته د دوی د وړتیاوو لوړولو په پار د یادې پروژې له خوا روزنیزې برنامې هم په لاره اچول شوي دي.
د اوبولګولو په برخه کې؛ د اوبولګولو او د اوبو د ضایعاتو د مخنیوي په پآر په جوزجان ولایت کې د اوبولګولو د ۹۱۱ متره کانال بیارغول ددې پروژې کړنې دي.
د شنوخونو د دودولو په برخه کې، ۱۶ شنې خونې جوړول، چې په دغو شنوخونو کې ۴۰۰ مېرمنو ته د سبو د تولید په برخه کې د عملي روزنې برنامې په لاره اچول شوي دي، ددې پروژې نورې کړنې دي.
دغه راز د جوزجان په ولایت کې، د بڼوالۍ په برخه کې، یاده پروژه د انګورو ۱۰۰ جریبه بڼونه بیا رغولي دي.
دغه فعالیتونه، د جوزجان، سمنګان او بلخ ولایتونو د کرنې ریاستونو په همغږی سره د اکټیډ « ACTED» موسسې د «بدیل» پروژې له لارې عملي شوي دي.
ددې پروژې موخه، د قانوني کرکېلي له لارې د مخدره توکو د تولید او مصرف ټیټوالی او دغه راز د تلپاتې کرنیزو فارمونو او کورنیو فارمونو له لارې د بلخ، جوزجان او سمنګان په ولایتونو کې له دې پروژې څخه د برخمن شویو کسانو اقتصادي وضعیت ښه کول دي.
یاده پروژه د بلخ، جوزجان او سمنګان په ولایتونو کې د تلپاتې کرنیزو فارمونو له لارې او له کرنیزو فارمونو بهر ددې پروژې د برخمنو کسانو د اقتصادي ودې په موخه همکاري کوي، ترڅو باکیفیت او ارګانیک (عضوي) کرنیز توکي تولید کړي.
دغه چوپړونه، د ځنځیري او صنعتي نباتاو د ارزښت لوړولو، د چرګانو کورني فارمونو جوړول، د اوبولګولو د کانالونو بیارغول، د انګورو بڼونو بیارغول او په شنوخونو کې د سبو د تولید له لارې وړاندې شوي دي.
دغه راز یاده پروژه بزګرانو ته د بسته بندی د توکو د چمتو کولو، د بازارموندنې غونډې او په کرنیزو نندارتونونوکې د ګډون په موخه د اسانتیاوو په برابرولو سره همکارۍ کړي، ترڅو د خپلو محصولاتو ارزښت لوړ کړي.
