کونړ کې د تخم پلورونکو هټیو څخه څارنه ترسره شوه
۱۷ لړم ۱۴۰۵ هـ.ش
۲۷ جُمَادَى الأول ۱۴۴۸ هـ.ق
د کرنیزو تخمونو د کیفیت ډاډمنتیا او په بازار کې د تاریخ تېرو، تقلبي او بېکیفیته تخمونو د پلور د مخنیوي په موخه، د کونړ ولایت په یو شمېر تخم پلورونکو هټیو څارنه ترسره شوه.
دغه څارنه د ننګرهار د کرنې، اوبو لګولو او مالدارۍ ریاست د ختیځ زون د کرنیزو تخمونو د تصدیق ورکولو آمریت د کارکوونکو له لوري ترسره شوه، چې پر مهال یې د تخم پلورونکو هټۍ د کرنیزو تخمونو د کیفیت، اعتبار او نېټې له پلوه و ارزول شوي.
د څارنې په پایله کې یو شمېر د سبو تاریختېر او بېکیفیته تخمونه راټول شول او پلورونکو ته سپارښتنه وشوه، چې بزګرانو ته باکیفیته او اصلاح شوي تخمونه وړاندې کړي او له غیرمعیاري او تاریختېرو تخمونو له پلور څخه ډډه وکړي.
د ننګرهار د کرنې، اوبو لګولو او مالدارۍ ریاست ډاډ ورکوي، چې د بزګرانو د حقونو د خوندیتوب او د کرنیزو تخمونو د کیفیت د کنټرول په موخه به خپلې څارنې روانې ساتي او له سرغړوونکو سره به د نافذه قوانینو له مخې چلند وشي.
