د کرنې وزارت مالي او اداري مرستیال د اقتصاد وزارت د څارنې ټيم سره وکتل
۲۹ سلواغه ۱۴۰۴ه.ش
۱ رَمَضانُ المُبارَک ۱۴۴۷ه.ق
د کرنې، اوبو لګولو او مالدارۍ وزارت مالي او اداري مرستیال، مولوي نورالدين عمير، د اقتصاد وزارت د پرمختيايي پروژو د پلي کولو د څارنې له ټيم سره د ياد وزارت په مالي او اداري معينيت کې وکتل. په دې کتنه کې د پرمختيايي بوديجې د لګښت وضعيت، د پروژو د پلي کېدو بهير او شته ننګونې وڅېړل شوې.
د غونډې په ترڅ کې د کرنې وزارت مالي او اداري مرستیال د امارتي ادارو ترمنځ پر همغږۍ او همکارۍ ټينګار وکړ او ويې ويل، چې په روان کال کې د کرنې وزارت په چوکاټ کې ۲۱ پرمختيايي پروژې پلې شوې دي او د دغو پروژو د پرمختګ بهير د قناعت وړ بلل کېږي.
همدارنګه، د کرنې وزارت د مالي رياست او د پلان او پاليسۍ رياست چارواکو هغه ستونزې يادې کړې، چې د پروژو د پلي کېدو پر بهير يې اغېز کړی دی. په دغو ستونزو کې د بوديجې پر وخت نه توشيح او نه تخصيص، د کرنيزو پروژو فصلي ماهيت، د هېوادونو ترمنځ د سياسي شرايطو له امله د ماشينآلاتو او درملو پر وارداتو محدوديتونه، او همدارنګه د تدارکاتي بهير اوږدېدنه شامله ده.
د وړاندې شويو معلوماتو پر بنسټ، تر اوسه پورې د کرنې وزارت لپاره له ځانګړې شوې بوديجې څخه څه باندې ۷۵ سلنه لګول شوې ده او اټکل کېږي، چې د مالي کال تر پايه به دا کچه ۸۵ سلنې ته لوړه شي.
