د پنجشېر په ولایت کې له کډوالۍ راستنوشویو ۱۲۰۰ کورنیو ته د خوراکي غنمو او نغدو پیسو وېش لړۍ پیل شو
۲۳ سلواغه ۱۴۰۴ه.ش
۲۴ شَعبان المُعَظّم ۱۴۴۷ه.ق
د عاليقدر امیرالمؤمنین حفظهالله د ځانګړي شفقت او پیرزوینې له مخې، د کرنې، اوبو لګولو او مالدارۍ وزارت له لوري د پنجشېر په ولایت کې هغو ۱۲۰۰ کورنیو ته چې له ګاونډیو هېوادونو څخه هېواد ته راستانه شوي دي، د بشري مرستو د وېش لړۍ پیل شوه. په دغو مرستو کې خوراکي غنم او نغدې پیسې شاملې دي.
یاد پروګرام د کرنې، اوبو لګولو او مالدارۍ وزیر مولوي عطاءالله عمري او د پنجشېر والي حافظ محمد آغا حکیم، د سیمه ییزو چارواکو او د علماوو شورا په حضور کې پرانیستل شوه. د دې بهیر په ترڅ کې هرې کورنۍ ته د بېړنیو معیشتي اړتیاوو د پوره کولو په موخه ۲۵۰ کیلوګرامه غنم (پنځه بورۍ) او پنځه زره افغانۍ نغدې پیسې ووېشل شوې.
مولوي عطاءالله عمري په دې مراسمو کې د هغو ستونزو یادونه وکړه، چې کډوال د ایستلو په بهیر کې ګاللې دي، او ټینګار یې وکړ چې د افغانستان اسلامي امارت د راستنېدونکو ملاتړ ته ژمن دی او هڅه کوي، چې د هغوی اساسي اړتیاوې، په ځانګړي ډول د خوراکي توکو او د ژوند د لومړنیو اړینو توکو په برخه کې، پوره کړي.
د پنجشېر والي هم وویل، چې د دغو کورنیو د ستونزو د حل بهیر روان دی او د هغوی د معیشتي وضعیت د ښه والي لپاره لازم اقدامات ترسره شوي دي.
له کډوالۍ راستنو شویو کورنیو د دغو مرستو د ترلاسه کولو له امله خوښي څرګنده کړه او ویې ویل، چې دا مرستې یې د لومړنیو اړتیاوو یوه مهمه برخه پوره کوي او په هېواد کې د نوي ژوند د پیل لپاره اغېزمن رول لري.
د چارواکو په خبره، د یادو مرستو د وېش لړۍ به د هېواد په نورو ولایتونو کې هم دوام ومومي، څو د خوراکي خوندیتوب د تأمین، د زیانمنو قشرونو د ملاتړ او د ټولنیزې همغږۍ د پیاوړتیا له لارې د راستنېدونکو د بېرته ستنېدو او بیا ادغام بهیر اسانه شي.
