د کرنیزو څېړنو انسټیټیوټ د کلني علمي پایلو راپور ورکولو کنفرانس پیل شو
۱۲ سلواغه ۱۴۰۴ه.ش
۱۳ شَعبان المُعَظّم ۱۴۴۷ه.ق
د کرنیزو څېړنو انسټیټیوټ ریاست د تجربو او څېړنو د ۱۴۰۴ هـ.ل کال د کلني علمي پایلو د راپور ورکولو کنفرانس، د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني، رییسانو، سلاکارانو، متخصصینو، د علومو اکاډمۍ استازي، د کابل پوهنتون استادانو، د څېړنیزو فارمونو کارکوونکو، د ملګرو ملتونو د خوړو او کرنې ادارې«افاېاو» او ټیکا استازو په حضور کې، د کابل د بادامباغ په څېړنیز فارم کې پیل شو.
د یاد کنفرانس په پیل کې، مولوي صدراعظم عثماني په خپله وینا کې د کرنیزو هېوادونو په پرمختګ او ځانبساینې کې د څېړنو پر اهمیت ټینګار وکړ او ویې ویل، چې د څېړنو په برخه کې پانګونه د سترو لاسته راوړنو د ترلاسه کولو زمینه برابروي. نوموړي زیاته کړه، چې د تېرو کلونو له محدودیتونو سره سره، اوس په هېواد کې د کرنیزو څېړنو د پراختیا لپاره مناسبه زمینه برابره شوې او د کرنې وزارت له دې برخې څخه په پوره توان ملاتړ کوي.
همدارنګه، د کرنیزو څېړنو انسټیټیوټ لوی رییس مولوي نصرالله طلحه، د روان کال په ترڅ کې په مرکز او ولایتونو کې د ترسره شویو څېړنیزو د فعالیتونو په اړه معلومات وړاندې کړل.
ورپسې، اړوندو رییسانو، د زونونو د څېړنیزو برخو مدیرانو او د ملګرو ملتونو د خوړو او کرنې ادارې استازي د هېواد په بېلابېلو برخو کې د سږني کال د لاسته راوړنو او فعالیتونو په اړه معلومات شریک کړل.
دا کنفرانس به څلور ورځې دوام ولري او د هېواد له ټولو زونونو او ولایتونو څخه د څېړنیزو فارمونو چارواکي په کې ګډون لري، تر څو خپلې تجربې او فعالیتونه له یو بل سره شریک کړي.
