کونړ کې د غنمو پر نويو اصلاح شويو ډولونو پراخې څېړنې روانې دي
۹ مرغومې ۱۴۰۴ه.ش
۹ رَجَب المُرَجَّب ۱۴۴۷ه.ق
د کونړ ولایت د کرنې، اوبولګولو او مالدارۍ ریاست اړوند د سالارباغ څېړنیز فارم کې د غنمو د اصلاح او تولید د پراختیا په موخه پر بېلابېلو بوټو، په ځانګړي ډول پر غنمو، ګڼې علمي او عملي څېړنې روانې دي چې موخه یې د چاپېریالي شرایطو سره د نويو ډولونو د توافق ارزونه او د اصلاح شويو تخمونو تولید دی.
د یاد فارم د څېړنیزو فعالیتونو له مخې، د غنمو د اصلاح په برخه کې څلور بېلابېلې تجربې تطبیق شوې دي، چې په ترڅ کې یې د غنمو ۵۰ نويو ډولونو (لاینونو) مطالعه د اقلیمي او چاپېریالي شرایطو سره د برابرۍ په هدف ترسره کېږي. همدارنګه، د وچو (للَمي) سیمو لپاره د غنمو د ۲۴ نويو ډولونو جلا څېړنیزه تجربه روانه ده.
په همدې لړ کې، د غنمو د زرپخېدونکو (Early Matur) ډولونو په اړه یوه نړۍواله څېړنیزه تجربه هم تر کار لاندې ده، چې پکې د غنمو ۱۰۰ ډولونه د مطالعې او ارزونې په پړاو کې دي.
د ناروغیو د څېړنو په برخه کې، د غنمو د خاکسترکي (Powder Mildew) ناروغۍ د کیمیاوي کنټرول په موخه د څلورو بېلابېلو کیمیاوي درملو د اغېزمنتیا او موثریت مطالعه ترسره کېږي. سربېره پر دې، د غنمو په حاصلاتو د کښت د وخت د اغېزو د معلومولو لپاره ځانګړې څېړنیزې تجربې هم عملي شوي دي.
همدارنګه، د غنمو د مورني تخم د تولید په موخه، د سالارباغ څېړنیز فارم په دوه جریبه ځمکه کې د غنمو د «کونړ۲۰» او «نصرت ۲۰» په نومونو دوه اصلاح شوي ورایټۍ کرل شوې دي، چې موخه یې د تخم تولیدي شرکتونو له لوري د غنمو د نورو اصلاح شويو صنفونو د تخمونو تولید ته زمینه برابرول دي.
