د کرنې په وزارت کې د غرونو نړیواله ورځ ولمانځل شو
۲۴ لېندۍ ۱۳۹۸
د کرنې، اوبولګولو او مالدارۍ وزارت، د چاپېریال ساتنې ملي ادارې، د اوبو او انرژۍ وزارت، په افغانستان کې د وحشي ژویو د ژوند د تحفظ موسسې او یوشمېر نړوالې ادارې په ګډه د پوهنتون د یوشمېر استادانو او متخصصینو په شتون کې د غرونو نړیواله ورځ ولمانځل. هر کال د دسامبر ۱۱ مه د غرونو د نړیوالې ورځې په توګه لمانځل کیږي.
د غرونو د نړیوالې ورځې په لمانځغونډه کې دکرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري د انسانانو په ژوند کې د غرونو رول مهم او حیاتي وبلل او زیاته یې کړه: «غرونه د انسانانو د ژوند اساس جوړوي. ځنګلونه، څړځایونه، طبي نباتات، اوبه، معدنونه، وحشي ژوي او کنګلونه ټول په غرونو کې دي او سرچینه یې غرونه دي.»
هغه دغه راز وویل، چې د کرنې، اوبولګولو او مالدارۍ وزارت د جلغوزې، پستې او چهارمغزو د نیالګیو کېنولو له لارې د ځنګلونو د بیارغونې او د وحشي ژویو د سیمو د تنظیم او دغه راز د څړځایونو د جوړولو په پآر برنامې لري.
په همدې حال کې د چاپېریال ساتنې د ملي ادارې مسلکي مرستیال عزت الله صدیقي وویل، چې غرونه له اقلیم او ایکو سیسټم سره پېچلي اړیکې لري او نه باید یې ساتنه او سرشارو سرچینو ته کمه پاملرنه ووشي. هغه زیاته کړه: «غرونه دحمایتي چوپړتیاو، د محصولاتو وړاندې کولو، د کنګلونو او د اوبو سرچینې دي.»
په ورته وخت کې په دې غونډه کې د اوبو او انرژۍ وزارت د اوبو د سرچینو مشر فایز الرحمن عزیزي وویل: «غرونه د اوبو سترې سرچینې، د کنګلونو د اوبو زېرمې او د برېښنا د ایجادولو سترې سرچینې دې. د اوبو جریان د کرنې، اوبولګولو، طبي نباتاتو او د برښنا د تولید لامل کيږي.»
افغانستان د هغو هېوادونو په ډله کې ده، چې ۷۵ سلنه یې غورنه دي، چې دغه غرونه د هېواد طبیعي امتیازات ګڼل کیږي. د څښلو او کرنې لپاره کابو ۸۵ سلنه خوږې اوبه له غرونو سرچینه اخلي.
د طبیعي سرچینو له نظره د هېواد ۹۰ ځنګلونه په غرنیو سیمو کې دي او غرونه د مالدارانو د مالونو لپاره هم ښې ګټې لري. دغه راز باید وویل شي، چې د څړځایونو کابو ۵۰ سلنه غر نۍ سیمو کې دي او د مالدارۍ د ودې په خاطر زیات اهمیت لري.
