۲۱ غبرګولی ۱۳۹۹

د کندهار د کرنې، اوبولګولو او مالدارۍ ریاست ددې ولایت په زیانمنو سیمو او بڼونو کې د ملخانو پر وړاندې د مبارزې کمپین پیل کړ.

د کندهار ولایت دکرنې ریاست د بوټې ساتنې د برخې کارکوونکي له څو ورځو را په دې خوا د کندهار ولایت په مرکز او ددې ولایت د ډنډ، دامان، تخته پل او سپین بولدک ولسوالیو زیانمنې سیمې سروې او تثبیت کړي او وروسته د ملخانو د کنټرول په موخه یې کیمیاوي مجادله پیل کړئ دی.

ټاکل شوې، چې د مجادلې دیاد ټیم له خوا به د زیانمنو سیمو ملخان کنټرول شي ترڅو د بزګرانو کروندې او بڼونه د ملخانو له یرغله خوندي پاتې شي او ترڅنګ یې بزګرانو او بڼوالو ته د ملخانو د مخنیوي په برخه کې عامه پوهاوی هم ورکول کیږي.

د یادونې وړ ده، چې د کندهار د کرنې ریاست کارکوونکي تر هغه چې ډاډه نه شي، چې صحرایي ملخان یې کنټرول کړي او له منځه یې وړي په زیانمنو سیمو کې کار کوي او که ملخان ددې ولایت نورو ولسوالیو کې پیدا شي په ډېر لږ وخت کې به د کرنې ریاست کارکوونکي ملخان له منځه یوسي او د کروندګورو کروندې او بڼونه به خوندي کړي.