کندهار کې د طبیعي او ځنګلي بوټو د خوندیتوب په پار هڅې
۲۶ وری ۱۴۰۴ ه.ش
۱۷ شَوّالُ المُکَرَّم ۱۴۴۶ه.ق
د کندهار د کرنې، اوبو لګولو او مالدارۍ ریاست تر رهبري لاندې د سپین بولدک ولسوالی د کرنې او مالدارۍ مسؤلینو او د ځنګلونو او څړځایونو د تنظیم چارواکو د یادي ولسوالۍ د کونچي، سوره څاهان، برکت، تنګی، زرګر تنګی او یو شمېر نورو سیمو کې د ځنګلونو پریکولو مخنیوی، ساتنې او پوهاوي په موخه څارنه ترسره شوه، چې په ترڅ کې یې د سیمې اوسېدونکو او مالدارانو ته د طبیعي، ځنګلي او نیمه ځنګلي بوټو د پرېکولو مخنیوي، ساتنې او ارزښت اړوند پوهاوی ورکړل شو.
یاده څارنه د دې لپاره ترسره شوه، ترڅو د سیمې اوسیدونکي د طبیعي شتمنیو په ارزښت پوه شي او په ساتنه کې یې جدي ونډه واخلي. مسؤلینو وویل، چې هېڅ ډول زیانمن فعالیت ته به اجازه نه ورکوي او په دې برخه کې به لا زیات اقدامات ترسره کړي.
د یادونې وړ ده، چې اوونۍ وړاندې د کندهار پنجوایي ولسوالی کې هم د ځنګلي، طبیعي او ریګي بوټو د ساتنې او د یادو توکو د پوهاوی په موخه څارنه ترسره شوې وه، چې په ترڅ کې یې د یادې ولسوالی یو شمیر اوسیدونکو او مالدارانو ته د طبیعي او ځنګلي بوټو د مخنیوي او ساتنې لپاره عامه پوهاوي ورکړل شوه.
