پکتیا: له کډوالۍ راستنوشویو ۱۲۰۰ کورنیو سره د مرستو وېش بشپړ شو
۲۵ سلواغه ۱۴۰۴ه.ش
۲۶ شَعبان المُعَظّم ۱۴۴۷ه.ق
د پکتیا د کرنې، اوبو لګولو او مالدارۍ ریاست له لوري د مرستو په لړ کې، له کډوالۍ راستنوشویو ۱۲۰۰ کورنیو سره د مرستو وېش بشپړ شو.
یادې مرستې د ولایت په مرکز او ولسوالیو کې مستحقو کورنیو ته ووېشل شوې، چې له مخې یې هرې کورنۍ ته پنځه بوجۍ غنم او پنځه زره افغانۍ نغدې پیسې ورکړل شوې، څو وکولای شي د خپل ژوند لومړنۍ اړتیاوې تر یوه بریده پوره کړي.
د یاد ریاست مسؤلینو څرګنده کړه، چې دغه مرستې د راستنو شوو کډوالو د اقتصادي ستونزو د کمولو او د بېرته مېشتېدو د بهیر د ملاتړ په موخه ترسره شوې دي. همدارنګه زیاته شوه، چې ریاست ژمن دی څو په راتلونکي کې هم له اړمنو کورنیو سره خپلې همکارۍ ته دوام ورکړي.
د یادونې وړ ده، چې دا بهیر یوازې په پکتیا ولایت پورې محدود نه دی، بلکې د هېواد په کچه روان دی او د کرنې، اوبو لګولو او مالدارۍ وزارت له لوري په ټولو ولایتونو کې پر زرګونو راستنو شويو کډوالو د خوراکي او نغدي مرستو د وېش لړۍ پیل شوې، تر څو د هغوی ستونزې راکمې، د عزتمند ژوند د بیا پیل زمینه برابره او ټولنیز ثبات پیاوړی شي.
